Azərbaycanda bu məhsullar bahalaşıb

Bu ilin fevral ayında ərzaq qiymətləri indeksi 127.1 bəndə yüksəlib.

Millixəbər.az Milli.Az-a istinadən xəbər verir ki, bu barədə BMT-nin Ərzaq və Kənd Təsərrüfatı Təşkilatının (FAO) məlumatında deyilir.

FAO-nun hesabatına əsasən, bu, yanvar ayı ilə müqayisədə 1.6%, ötən ilin eyni dövrü ilə müqayisədə isə 8.2% artım deməkdir.

Bildirilib ki, əsas qiymət artımları taxıl, bitki yağları, süd və şəkər məhsullarında müşahidə olunub.

Məlumata görə, fevral ayında FAO-nun taxıl qiymətləri indeksi 112.6 bənd təşkil edib ki, bu da yanvar ayına nisbətən 0.7% artım deməkdir. Əsas səbəblər arasında Rusiya və ABŞ-də əlverişsiz məhsul şəraiti və Argentinada istehsalın azalması qeyd edilir.

Fevral ayında bitki yağlarının qiyməti 2% artaraq 156 bəndə çatıb. FAO-ya görə, bu artım Cənub-Şərqi Asiyada hasilatın azalması və İndoneziyada biodizel sənayesindən yüksək tələblə əlaqəlidir.

FAO-nun açıqladığı ərzaq qiymətləri indeksinə əsasən, bu ilin fevral ayında ət məhsullarının qiymət indeksi 118 bənd təşkil edib. Bu, yanvar ayı ilə müqayisədə 0.1% azalma olsa da, ötən ilin eyni dövrü ilə müqayisədə 4.8% artım deməkdir. Ət məhsullarının qiymət indeksinin azalmasının əsas səbəbləri arasında Braziliyada yüksək təklif fonunda mal və quş ətinin ucuzlaşması qeyd olunur.

Süd məhsulları fevral ayında 4% bahalaşıb. Xüsusilə pendir və kərə yağı qiymətlərində ciddi artım qeydə alınıb. Ekspertlər bunu Okeaniyada süd istehsalının azalması ilə əlaqələndirirlər.

Fevral ayında şəkər qiymətləri yanvara nisbətən 6.6% artsa da, ötən ilin eyni dövrü ilə müqayisədə 15.8% azalma müşahidə edilib. Hindistanda istehsalın azalması və Braziliyadakı hava şəraiti bu bahalaşmaya təsir edən əsas faktorlar sırasındadır.