Binəqədi bələdiyyəsinin sədrinin köməkçisi işləmiş şəxs dələduzluq əməli törədib.

Resmi.media xəbər verir ki, məlumata görə, Pərvin adlı həmin şəxs tanışı A.S. adlı xanımın 17 000 manatını ələ keçirib. Sonradan pulun 10 000 manatını geri qaytarıb.

O, A.S.-ya Binəqədi bələdiyyəsində iş vəd edib. Daha doğrusu, onu ayda 500 manat əmək haqqı müqabilində işə “düzəldib”. Hətta birinci ay ona 250 manat “maaş” da verib.

Bundan başqa, Pərvin A.S.-nın anasının məzarını təmir etdirəcəyini, mərmər daş qoyacağını vəd edib və buna görə zərərçəkmişdən 3000 manat alıb.

Zərərçəkmiş ifadəsində onu da qeyd edib ki, Pərvin Rafael Cəbrayılov adlı dayısının olduğunu və general rütbəsi daşıdığını deyib. O, problemləri həmin dayısının köməyi ilə həll etdiyini bildirib.

Bu əməlləri törədən bələdiyyə sədrinin keçmiş köməkçisi zərərçəkmişin şikayəti əsasında saxlanılıb. Ona Cinayət Məcəlləsinin 178.2.4-cü maddəsi ilə ittiham edilib və barəsində barəsində başqa yerə getməmək haqqında iltizam qətiimkan tədbiri seçilib. İbtidai istintaq bitdikdən sonra iş baxılması üçün Nərimanov Rayon Məhkəməsinə göndərilib. İşə hakim Gültəkin Əsədovanın sədrliyi ilə baxılıb.

Pərvin məhkəmə prosesində ittihamları qəbul etmədiyini, zərərçəkənin yalan ifadə verdiyini bildirib. İşdə adı keçən Binəqədi bələdiyyəsinin hüquq şöbəsinin Eldar adlı müdiri isə məhkəməyə ifadəsində zərərçəkmişin qismən doğru danışdığını deyib. Prosesdə məlum olub ki, Pərvin Eldarı A.S.-ya mərmər sexi olan tanışı kimi təqdim edib.

Martın 3-də proses yekunlaşıb və təqsirləndirilən şəxsə hökm oxunub. Pərvin 2 il müddətinə azadlığın məhhdudlaşdırılması cəzasına məhkum edilib. Təqsirlənriilən şəxsin istintaq zamanı həbsdə saxlanıldığı 2 gün azadlığın məhdudlaşdırılmasının 4 gününə bərabər tutulub və ona təyin edilmiş cəzadan çıxılıb. Onun üzərində qəti olaraq 1 il 11 ay 26 gün müddətə azadlığın məhdudlaşdırılması cəzası saxlanılıb.//qaynarinfo