Bonn şəhərində keçirilən BMT-nin İqlim Dəyişmələri üzrə Çərçivə Konvensiyasının Yardımçı Orqanlarının 62-ci sessiyası (SB62) çərçivəsində Azərbaycan QHT-lərin iştirakı ilə İqlim Kampında xüsusi tədbir təşkil olunub.

Sessiyanın ikinci günü – 2025-ci iyunun 17-də “Green World: Nature and Culture” pavilyonunda baş tutan sərgi xarakterli təqdimat zamanı Azərbaycanın iqlim dəyişmələri ilə mübarizədə artan təşəbbüskarlığı, zəngin mədəni irsi, milli dəyərləri və Qlobal Cənub ölkələrinə verdiyi dəstək beynəlxalq ictimaiyyətin diqqətinə çatdırılıb. Tədbir zamanı pavilyonda bir neçə xüsusi guşə təşkil olunub. COP29-a həsr olunmuş guşədə həmçinin QHT-lərə Dövlət Dəstəyi Agentliyin COP29-a həsr edilmiş xüsusi jurnalı qonaqlara təqdim edilib. Qlobal Cənub QHT Platforması guşəsində 2025-ci ilin aprel ayında Bakı şəhərində təsis edilmiş bu Platformaya həsr olunmuş materiallar nümayiş etdirilib. Azərbaycan mədəniyyət guşəsində milli mətbəxin ləziz şirniyyatları Azərbaycan çayı ilə birlikdə qonaqlara təqdim edilib. “Tullantıdan İncəsənətə” adlı sərgidə isə yerli ekoloji fəallar tərəfindən tullantı materiallardan yaradılan sənət əsərləri nümayiş etdirilib.
Tədbirdə ziyarətçilər Azərbaycanın QHT-lərinin beynəlxalq müstəvidə Qlobal Cənub ölkələrinin səsinin daha da gücləndirilməsi naminə fəaliyyəti ilə yaxından tanış olmaq imkanı da qazanıb.