]17 iyun 2025-ci il tarixində rayon ərazisində fəaliyyət göstərən Ə.D.Məlikov adına Binəqədi Tibb Mərkəzində “17 İyun – Tibb İşçilərinin Peşə Bayramı Günü” münasibətilə tədbir keçirildi.

Millixəbər.az-ın məlumatına görə, tədbirdə Binəqədi Rayon İcra Hakimiyyəti başçısının müavini Sevinc Süleymanova, Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini Elnur Məmmədov, Ə.D.Məlikov adına Binəqədi Tibb Mərkəzinin direktoru Müşfiq Mirzəyev, Binəqədi Rayon Gigiyena və Epidemiologiya Mərkəzinin direktoru Fədai Hacıyev və Binəqədi rayonu ərazisində fəaliyyət göstərən tibb müəssisələrinin məsul əməkdaşları iştirak etdilər.

Tədbiri giriş nitqi ilə açan Rayon İcra Hakimiyyəti başçısının müavini Sevinc Süleymanova səhiyyə işçilərini "17 İyun - Tibb İşçilərinin Peşə Bayramı Günü” münasibətilə təbrik edərək, qeyd etdi ki, Azərbaycan Respublikasının Prezidenti cənab İlham Əliyevin rəhbərliyi altında aparılan genişmiqyaslı islahatlar, milli səhiyyə sistemimizin sürətlə müasirləşirməsi, vətəndaşlarımızın dövlətin yaratdığı tibb xidmətlərindən yüksək səviyyədə yararlanması əhalinin sağlamlığının etibarlı təminatına xidmət edir. Müasir tibb mərkəzlərinin açılması, köhnə tibb ocaqlarının yenidən bərpa olunaraq müasir avadanlıqlarla təmin olunması, səhiyyə sisteminin inkişafı, bu sahənin maddi-texniki bazasının, kadr potensialının gücləndirilməsi və infrastrukturun yeniləşdirilməsi daim dövlətin diqqət mərkəzindədir. Heydər Əliyev Fondu və onun rəhbəri - Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə səhiyyənin ən çətin problemlərinin həlli üçün icra edilən proqramlar əhalinin, xüsusən də gənc nəslin sağlamlığının qorunmasında mühüm rol oynayır.

Sonda tədbirdə iştirak edən səhiyyə işçiləri adından çıxış edənlər - Ə.D.Məlikov adına Binəqədi Tibb Mərkəzinin direktoru Müşfiq Mirzəyev, Binəqədi Rayon Gigiyena və Epidemiologiya Mərkəzinin direktoru Fədai Hacıyev tibb müəssisələrində yaradılan şəraitə və səhiyyə işçilərinə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezidenti Mehriban xanım Əliyevaya təşəkkürlərini bildirdilər.

Tədbirin sonunda bir qrup tibb işçisi Rayon İcra Hakimiyyəti başçısının Fəxri fərmanı və hədiyyələr ilə təltif olundular.