Hazırda Naxçıvan Muxtar Respublikası Həmkarlar İttifaqları Şurasının tabeliyində 509 ilk təşkilat və ümumilikdə 42 min 73 nəfər üzv var. İlk dəfə olaraq 200 nəfərə yaxın təşkilat nümayəndəsinin iştirakı ilə baş tutan bugünkü tədbirdə iştirakçılarla birbaşa ünsiyyət quraraq onların mövcud problemləri və təklifləri ilə tanış olduq. Görüş olduqca məhsuldar keçdi.

Millixeber.az AZƏRTAC-a istinadən xəbər verir ki, bu sözləri Azərbaycan Həmkarlar İttifaqları Konfederasiyasının sədr müavini, Naxçıvan Muxtar Respublikası Həmkarlar İttifaqları Şurasının sədri Qəzənfər Abdullayev jurnalistlərə müsahibəsində bildirib.

Sədr qeyd edib ki, bu dəfə görüşün formatında yenilik edilərək tədbir Həmkarlar İttifaqları Şurasının balansında olan “Duzdağ” oteldə təşkil olunub: “Bu format daha səmərəli oldu. Tədbir zamanı iştirakçılar tərəfindən ünvanlanan suallar birbaşa cavablandırıldı. Hər kəs öz təşkilatında mövcud olan məsələləri qaldırdı. Biz də Həmkarlar İttifaqları Şurası olaraq həmin məsələlərə həssaslıqla yanaşıb cavablandırmağa çalışdıq".

"Qeyd etmək istəyirəm ki, Naxçıvan Muxtar Respublikası Həmkarlar İttifaqları Şurası yeni bir layihəyə start verir. Yay mövsümündə İttifaq üzvləri aldıqları yollayışların dəyərinin cəmi 15 faizini ödəməklə həftənin şənbə və bazar günləri Ağbulaq İstirahət Mərkəzində maraqlı və yaddaqalan həftəsonu keçirəcəklər. Bundan əlavə, sanatoriyalara yollanış məsələsi də ilk dəfə olaraq tam elektronlaşdırılıb və bu barədə maarifləndirici videoçarxlar hazırlanaraq təqdim olunub. Artıq həm Azərbaycan Həmkarlar İttifaqları Konfederasiyasının, həm də Naxçıvan Muxtar Respublikası Həmkarlar İttifaqları Şurasının üzvləri elektron qaydada müraciət edərək bu imkanlardan istifadə edə bilirlər”, - deyə Qəzənfər Abdullayev bildirib.