Şirak yeparxiyasının rəhbəri, Erməni Apostol Kilsəsinin (EAK) arxiyepiskopu Mikael Adjapaxyan İrəvan-Kentron cəzaçəkmə müəssisəsinə köçürülüb.

Oxu.Az xəbər verir ki, bu barədə Ermənistan KİV məlumat yayıb.

Qeyd olunur ki, "Müqəddəs mübarizə" hərəkatının lideri Baqrat Qalstanyan və biznesmen Samvel Karapetyan da həmçinin İrəvan-Kentron cəzaçəkmə müəssisəsində saxlanılırlar.

Adjapaxyan açıq şəkildə hökumətin devrilməsinə çağırışda ittiham olunur, lakin o, özü ittihamları uydurma adlandırıb. İyunun 27-də axşam arxiyepiskop Adjapaxyan saxlanılıb, iyunun 28-nə keçən gecə isə məhkəmə onun 2 ay müddətinə həbs edilməsi barədə qərar çıxarıb.


Şirak yeparxiyasının rəhbəri, Erməni Apostol Kilsəsinin (EAK) arxiyepiskopu Mikael Adjapaxyan İrəvanın birinci instansiya məhkəməsinin hakimi Masis Melkonyanın qərarı ilə həbs edilib.

Oxu.Az-ın "Sputnik Ermənistan"a istinadla verdiyi məlumata görə, bu barədə onun vəkili Ara Zohrabyan xəbər verib.

Onun sözlərinə görə, Mikael Adjapaxyan iki aylıq müddətə həbs olunub.

Lakin müdafiə tərəfi məhkəmənin bu qərarını qanunsuz adlandıraraq, ona qarşı apellyasiya şikayəti vermək niyyətindədir.

İlkin məlumata görə, Şirak yeparxiyasının rəhbəri "Nubaraşen" cəzaçəkmə müəssisəsinə köçürüləcək.

Xatırladaq ki, iyunun 27-si Ermənistanın Milli Təhlükəsizlik Xidmətinin əməkdaşları arxiyepiskop Mikael Adjapaxyanı bütün ermənilərin katolikosunun Eçmiədzindəki iqamətgahında həbs etməyə cəhd göstəriblər. Lakin kilsə xidmətçiləri və dindarlar müqavimət göstərərək, hüquq-mühafizə orqanlarının həbs aparmasına imkan verməyiblər. Daha sonra arxiyepiskop iqamətgahı tərk edərək İrəvana yollanıb və istintaq komitəsinə getməyə hazır olduğunu bəyan edib.

Ona hakimiyyəti devirməyə açıq çağırışlar etmək ittihamı irəli sürülüb. Lakin Adjapaxyan bu ittihamı saxta adlandırıb.

Xatırladaq ki, bu, son iki gündə həbs edilən ikinci arxiyepiskopdur. Bundan əvvəl isə yepiskop Baqrat Qalstanyan haqqında həbs qətimkan tədbiri seçilmişdi.