2030-cu ilə Azərbaycan Respublikasında müəyyən olunmuş sosial-iqtisadi inkişafın əsas prioritetlərindən biri də təhsil sahəsidir. Texnologiyaların belə sürətlə irəliləməsi fonunda dünyada artan rəqabətlə ayaqlaşmaq üçün müasir və güclü təhsil olduqca vacibdir. Məhz təhsil vasitəsilə insan kapitalının milli sərvətdə iştirak payı davamlı şəkildə artırılmalıdır.

Gələn ilin dövlət büdcəsində elm və təhsil xərcləri 5,2 milyard manat təşkil edir. Bu, 2024-cü ilin icra göstəricisinə nisbətən 658 milyon manat çoxdur. Ortamüddətli dövrlə, 2022-ci illə müqayisədə isə 2026-cı illə müqayisədə 36% artmış olacaqdır.

Son illərdə aparılan təhsil islahatları Azərbaycanda müəllimin bilik və bacarıqlarını inkişaf etdirməklə təhsilin keyfiyyətini yaxşılaşdırmağa hesablanıb.
Müəllim sağlam cəmiyyətin formalaşmasına, gənc nəslin inkişafına müstəsna töhfələr verən əsl qəhrəmandır. İkinci Qarabağ müharibəsində əsasən gənclərimizin iştirakı, onlara son 30 ildə aşılanmış yüksək vətənpərvərlik hislərinin nəticəsi idi ki, bunda məktəbin və müəllimlərimizin rolu danılmazdır.

Elm və Təhsil Nazirliyi tərəfindən təklif olunan müəllimlər üçün yeni yanaşma müəllim-şagird təmaslarını daha da artırmaqla, həm də müəllimlərin rifahının yaxşılaşdırılmasını qarşıya hədəf qoyur. Burada əsas məqsəd müəllimin şagirdlərlə daha çox vaxt keçirməsi üçün əlavə motivasiyanın yaradılmasıdır.

Nəzərə alınmalı vacib bir nüans da müəllimin tədrisi uğurla edə bilməsi üçün sinifdə olan şagird sayının öyrənmə standartlarına uyğun şəkildə bölüşdürülməsidir. Bir sinifdə 30-40 nəfər şagirdin tədrisini həyata keçirən müəllim üçün bu, tam ştata bərabər iş yüküdür. Bu, tədrisin keyfiyyətinə də mənfi təsir edir.

Elm və Təhsil Nazirliyinin yeni konsepsiyanı ictimai müzakirələrə çıxarması alqışlanmalıdır. Belə ki, müəllimlər, ümumilikdə təhsil sisteminə birbaşa aid olan şəxslər təklif olunan ideyanın potensial müsbət və mənfi tərəflərini qiymətləndirmək imkanı əldə edirlər. İrəli sürülən modelin məcburi olmaması, eyni zamanda müəllimlər üçün seçim imkanı yaradır. Etiraf eləməliyik ki, yeniliklər bütün cəmiyyətlərdə həssaslıqla qarşılanır. Bu bütün dövrlərdə belə olub. İdeyalar praktik tətbiq olunduqdan sonra boşluqlar üzə çıxır və aidiyyəti qurumlar ilkin dövrdə nəzərə alınmayan həmin boşluqları doldururlar.Burada əsas meyar təhsilin, habelə müəllim və şagirdin bilik və bacarığının artırılması olduğundan, məsələnin texniki və yardımçı tərəfləri həll edilə biləndir.

Bundan başqa, beynəlxalq təcrübəyə istinadən, müəllimin asistentinin olması da onun iş yükünün müəyyən dərəcədə bölüşdürülməsinə və tədrisin keyfiyyətinin yüksəldilməsinə imkan yaradar. Xüsusilə, ibtidai siniflərdə, azyaşlı uşaqlarla işləyən müəllimlər üçün bütün sinfə nəzarət etmək böyük məsuliyyətdir. Müəllimə köməkçi ştatının yaradılması, valideynlərlə daha çox görüşlərin keçirilməsi, məktəbdənkənar fəaliyyətlərin təşkili baxımından da faydalı olardı. Bununla, müəllimin iş şəraiti daha da yaxşılaşardı.

Pərvanə Vəliyeva
Milli Məclisin üzvü