Balakən rayonunun Katex kəndi ərazisi qədim tarixi abidələri ilə zəngindir. Kənddə yerləşən tarixi abidələr sırasında Böyük Qafqaz səddinin qalıqları da xüsusi yer tutur. Böyük Qafqaz səddi V əsrdə inşa edilib və 120 kilometrdən çox məsafəyə uzanır. Səddin qalıqları Balakən rayonunun Katex kəndi ərazisində də qorunub saxlanılır.

Millixeber.az xəbər verir ki, bu barədə AZƏRTAC-a açıqlamasında AMEA Şəki Regional Elmi Mərkəzinin böyük elmi işçisi tarix üzrə fəlsəfə doktoru Akif Məmmədli məlumat verib. Onun sözlərinə görə, Katex kəndi ərazisində Böyük Qafqaz səddinə aid 4 gözətçi qülləsi mövcuddur.

A.Məmmədli qeyd edib ki, X əsr ərəb tarixçisi Əl-Bəlazuri “Ölkələrin fəthi” əsərində Böyük Qafqaz səddi haqqında məlumat verib. Tarixçi əsərində səddin V əsrdə Sasani hökmdarı Qubad və onun oğlu Xosrov Ənuşirəvan tərəfindən şimaldan gələn türk axınlarının qarşısını almaq məqsədilə inşa edildiyini bildirib.

“Keçən il Edinburq və Kembric universitetlərinin alimləri Katex kəndinə səfər ediblər. Onlarla birgə tədqiqatlar apardıq, laborator analizlər üçün nümunələr götürdük. Bununla Böyük Qafqaz səddi üzərində aparılan bərpa işlərinin hansı dövrə aid olduğunu müəyyənləşdirməyə çalışırıq”, – deyə alim qeyd edib.