Türk Ağsaqqalları Arasında Əlaqələrin İnkişafı İctimai Birliyinin üzvü, pedaqogika üzrə elmlər doktoru, professor, Dilqəm Quliyev Prezident Cənab İlham Əliyevə məktub yazıb. Məktubda D.Quliyev Ali Baş Komandana “Qərbi Azərbaycanın idman tarixi” adlı monoqrafiyanın Şərqi Zəngəzurda monoqrafiyanın təqdimatının keçirilməsinə göstəriş verməsini xahiş edib.

Məktubun ixtisar edilmiş formasını təqdim edirik:


Azərbaycan Respublikasının Prezidenti

cənab İlham Əliyevə

Möhtərəm cənab Prezident! Müzəffər Ali Baş Komandan!

Əvvəla şəxsən öz adımdan və bütün ailə üzvlərim adından Sizi, qüdrətli Ordumuzu, xalqımızı və Sizin ən yaxın silahdaşınız olan Birinci vitse-prezident Mehriban xanım Əliyevanı Zəfər günü münasibətilə ürəkdən təbrik edirəm. Bu, bir tarixdir. Sizin rəhbərliyinizlə şanlı Azərbaycan Ordusu tarix yazdı. Qarabağın işğaldan azad olunmuş hər yerində, hər bir kəndində, həmçinin Şuşada Azərbaycanın üçrəngli bayrağı dalğalanır.
Allahdan şəhidlərimizə rəhmət, qazilərimizə şəfa diləyirəm.

Möhtərəm cənab Prezident!

Siz bu xalqın ürəyindən bu iki əsrlik qara ləkəni tamamilə sildiniz. Qazanılan qələbələr təkcə silahın gücü ilə deyil, eyni zamanda Sizin uzaqgörən diplomatiyanızın, dünyada yüksək nüfuzunuzun məntiqi nəticəsidir.

Möhtərəm cənab Prezident!

Siz dekabrın 24-də Qərbi Azərbaycan İcmasının inzibati binasında bir qrup ziyalı ilə keçirdiyiniz görüşdə dediyiniz kimi: "İnşallah! O gün gələcək. Necə ki 2020-ci ildə torpaqlarımızın işğaldan azad edildiyi gün gəldi. O günün yaxınlaşması üçün hər birimiz Qərbi Azərbaycan İcmasına əlimizdən gələn köməyi əsirgəməməliyik”.
Bu zərurətin mahiyyətini dərindən dərk edərək, Azərbaycan Milli Ensiklopediyasının bədən tərbiyəsi və idman bölməsi məqalələrinin müəllifi kimi, mən (D.Q.) ölkə Prezidenti İlham Əliyevin “Qərbi Azərbaycana qayıdış çağırışı”nı rəhbər tutaraq müvafiq sənədlərə və mənbələrə istinad edərək "Qərbi Azərbaycanın idman tarixi” adlı monoqrafiyanı yazdım və çap etdirdim.
Monoqrafiyanı yazmaqda əsas məqsəd elmi-publisistik müstəvidə ilk dəfə geniş şəkildə tədqiq olunan Qərbi Azərbaycanın idman salnaməsində xalqın yaddaşında yaşayan idman xadimləri və idmançılarımızın zəngin irsi araşdırılır və faktlarla oxucuya təqdim olunur.
Bu monoqrafiya Qərbi Azərbaycan idman tarixini belə geniş əhatə edən ilk nəşrdir. Monoqrafiya İdman Akademiyasının Elmi şurasının 14 iyul 2023-cü il tarixli iclasında (protokol № 13) müzakirə edilərək bəyənilmiş və nəşri məqsədəuyğun sayılıb.

Möhtərəm cənab Prezident!

“Qərbi Azərbaycanın idman tarixi” adlı kitabın təqdimatının Şərqi Zəngəzurda keçirilməsinə göstəriş verməyinizi Sizdən xahiş edirəm.

Dərin hörmət və ehtiramla,

Dilqəm Quliyev,
Türk Ağsaqqalları Arasında Əlaqələrin
İnkişafı İctimai Birliyinin üzvü,
pedaqogika üzrə elmlər doktoru, professor.