Müasir İnternet Resurslarının İnkişafı” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Uşaq və gənclərin internetdən düzgün istifadəsində milli və mənəvi təbliğatın rolu” layihəsi çərçivəsində Sabirabad rayonunda maarifləndirici tədbir təşkil edib.

Tədbirdə Sabirabad Rayon İcra Hakimiyyəti başçısının birinci müavini Həsən Həsənov, başçının müavini – Ərazi-təşkilat və ictimai-siyasi məsələlər şöbəsinin müdiri Ceyran Xəlilov, YAP Sabirabad rayon təşkilatının sədri Varis Rüstəmov, “Müasir İnternet Resurslarının İnkişafı” İctimai Birliyinin sədri və layihə rəhbəri Zamin Zeynal, Prezident təqaüdçüsü, şair-publisist, “Ədəbiyyat” qəzetinin şöbə redaktoru, Azərbaycan Yazıçılar Birliyinin Aran Bölməsinin sədri, eyni zamanda Birliyin İdarə Heyətinin üzvü Sərvaz Hüseynoğlu, rayonun ictimai fəalları, uşaq və gənclər iştirak ediblər.
Çıxış edənlər müasir dövrdə informasiya-kommunikasiya texnologiyalarının sürətli inkişafının gənc nəslin həyatına mühüm təsir göstərdiyini qeyd edərək, internet resurslarından düzgün və təhlükəsiz istifadənin vacibliyinə diqqət çəkiblər. Bildirilib ki, rəqəmsal mühitdə uşaq və gənclərin milli-mənəvi dəyərlərə bağlılığının gücləndirilməsi, onların dezinformasiyadan qorunması, kiberməkanın yaratdığı risklər barədə məlumatlandırılması və sağlam internet davranışlarının formalaşdırılması cəmiyyət üçün prioritet məsələlərdəndir.
Layihə rəhbəri, MİRİİB sədri Zamin Zeynal çıxışında göstərilən maliyyə və institusional dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin rəhbərliyinə təşəkkürünü bildirib. O qeyd edib ki, layihənin əsas məqsədi uşaq və gənclərdə internetdən məsuliyyətli, məqsədyönlü və təhlükəsiz istifadə vərdişlərinin formalaşdırılması, eyni zamanda milli və mənəvi dəyərlərin rəqəmsal mühitdə təbliği vasitəsilə onların mənəvi inkişafına töhfə verməkdir.
Zamin Zeynal vurğulayıb ki, informasiya cəmiyyətinin sürətlə inkişaf etdiyi müasir dövrdə uşaqların və gənclərin internet resurslarından faydalı məqsədlərlə istifadə etmələri, sosial şəbəkələrdə yayılan məlumatlara tənqidi yanaşmaları və milli maraqlara uyğun məzmunun təşviqinə üstünlük vermələri xüsusi əhəmiyyət daşıyır. O, həmçinin valideynlərin övladlarının rəqəmsal fəaliyyətinə diqqət yetirmələrinin, müəllimlərin isə valideynlərlə sıx əməkdaşlıq şəraitində maarifləndirici fəaliyyət aparmalarının vacibliyini qeyd edib.
Tədbir zamanı iştirakçılarla internet təhlükəsizliyi, sosial şəbəkələrdə etik davranış qaydaları, dezinformasiyanın yaratdığı risklər, rəqəmsal savadlılığın artırılması və milli-mənəvi dəyərlərin təbliği istiqamətində geniş fikir mübadiləsi aparılıb. Gəncləri maraqlandıran suallar cavablandırılıb, mövzu ətrafında müzakirələr təşkil olunub.
Çıxışlarda qeyd olunub ki, layihənin uğurla icrası nəticəsində cəmiyyətin müxtəlif təbəqələrində davranış və sosial təcrübə dəyişikliklərinin formalaşması gözlənilir. Layihə çərçivəsində uşaqlarda rəqəmsal məsuliyyət hissinin, gənclərdə milli dəyərlərə əsaslanan internet davranışlarının, valideynlərdə isə nəzarət və maarifləndirmə bacarıqlarının inkişaf etdirilməsi əsas hədəflərdən biridir.
Layihəni həyata keçirməkdə əsas məqsəd rəqəmsal dövrdə uşaq və gənclərin sağlam informasiya mühitində formalaşmasına, onların milli-mənəvi dəyərlərə bağlı, məsuliyyətli və vətənpərvər vətəndaşlar kimi yetişməsinə dəstək verməkdir.
Qeyd edək ki, “Uşaq və gənclərin internetdən düzgün istifadəsində milli və mənəvi təbliğatın rolu” layihəsinin icrası 01 may 2026-cı il tarixindən 31 iyul 2026-cı il tarixinədək davam edəcək.
Layihə çərçivəsində Abşeron və Sabirabad rayonlarında tədbirlərin, ictimai müzakirələrin keçirilməsi nəzərdə tutulub.