ZƏFƏR GÜNÜNDƏ QARABAĞDA QARDAŞLIQ GÖRÜŞÜ

Ərdoğanın Azərbaycana səfəri iki ölkə arasındakı tarixi dostluğun və strateji tərəfdaşlığın növbəti təzahürüdür

8 Noyabr – Zəfər Günü Azərbaycan xalqının yaddaşında əbədi yaşayacaq möhtəşəm tarixdir. Bu əlamətdar gündə Türkiyə Prezidenti Rəcəb Tayyib Ərdoğanın Azərbaycana rəsmi səfəri isə bayramın siyasi və mənəvi əhəmiyyətini daha da artıran mühüm hadisələrdən biri kimi diqqət çəkir.
Noyabrın 8-də Türkiyə Respublikasının Prezidenti Rəcəb Tayyib Ərdoğan xanımı Əminə Ərdoğanla birlikdə Azərbaycana rəsmi səfərə gəlib. Türkiyə dövlət başçısını və xanımını Füzuli Beynəlxalq Hava Limanında Azərbaycan Respublikasının Prezidenti İlham Əliyev və birinci xanım Mehriban Əliyeva qarşılayıblar. Ali qonağın şərəfinə fəxri qarovul dəstəsi düzülüb.
Səfərin məhz Zəfər Günündə, Azərbaycanın Vətən müharibəsində qazandığı tarixi Qələbənin altıncı ildönümündə reallaşması xüsusi rəmzi məna daşıyır. Bu, eyni zamanda, Azərbaycan-Türkiyə münasibətlərinin möhkəm təməllər üzərində qurulduğunu, iki xalq arasında mövcud olan dostluq və qardaşlıq bağlarının zamanın sınaqlarından keçdiyini bir daha nümayiş etdirir.
Qarabağ torpağında keçirilən qarşılanma mərasimi də bu baxımdan xüsusi əhəmiyyət kəsb edir. Türkiyə Prezidentinin səfəri Füzulidən başlayaraq Şuşada davam edib. Şuşada ali qonağın rəsmi qarşılanma mərasimi keçirilib, Azərbaycan və Türkiyə dövlət bayraqları dalğalanıb, hər iki ölkənin dövlət himnləri səsləndirilib. Prezident İlham Əliyev və Prezident Rəcəb Tayyib Ərdoğan arasında təkbətək görüş də keçirilməsi nəzərdə tutulan səfər proqramının mühüm hissəsidir.



Zəfərin sevincini bölüşən iki qardaş ölkə

2020-ci ildə 44 günlük Vətən müharibəsində Azərbaycanın qazandığı Qələbə ölkəmizin müasir tarixində yeni mərhələnin başlanğıcı oldu. Azərbaycan Ordusunun qəhrəmanlığı, xalqımızın birliyi və dövlətimizin qətiyyətli siyasəti nəticəsində torpaqlarımız işğaldan azad edildi. 8 Noyabr – Zəfər Günü isə bu tarixi Qələbənin rəmzinə çevrildi.



Həmin günlərdə Türkiyənin Azərbaycana göstərdiyi siyasi və mənəvi dəstək iki ölkə arasındakı münasibətlərin mahiyyətini bir daha ortaya qoydu. Türkiyə Prezidenti Rəcəb Tayyib Ərdoğan müharibə dövründə Azərbaycanın haqq mövqeyini dəstəkləyən bəyanatları ilə çıxış etdi. Bu dəstək Azərbaycan xalqının yaddaşında qardaşlıq münasibətlərinin mühüm nümunəsi kimi qaldı.



Bu gün Ərdoğanın Zəfər Günündə Qarabağa səfər etməsi həmin həmrəyliyin davamlılığını ifadə edən mühüm siyasi və mənəvi hadisədir. Səfər çərçivəsində Zəfər Gününə həsr olunmuş tədbirlərdə, o cümlədən hərbi paradda iştirak, eləcə də Qarabağın tarixi məkanlarına ziyarət proqramda yer alıb.



Bir millətin iki dövləti – ortaq gələcəyə doğru

Azərbaycan və Türkiyə münasibətləri yalnız diplomatik əlaqələrlə məhdudlaşmır. Bu münasibətlər ortaq tarixə, dilə, mədəniyyətə, milli-mənəvi dəyərlərə və qarşılıqlı etimada əsaslanır. Ulu öndər Heydər Əliyevin məşhur “Bir millət, iki dövlət” kəlamı bu əlaqələrin mahiyyətini dolğun şəkildə ifadə edir.
Prezident İlham Əliyev və Prezident Rəcəb Tayyib Ərdoğanın rəhbərliyi ilə iki ölkə arasında siyasi, iqtisadi, hərbi, enerji, nəqliyyat və humanitar sahələrdə əməkdaşlıq genişlənməkdədir. Şuşa Bəyannaməsi ilə müttəfiqlik münasibətlərinin hüquqi-siyasi əsaslarının möhkəmləndirilməsi də bu əməkdaşlığın mühüm mərhələsidir.
Bu gün Qarabağda aparılan bərpa və quruculuq işləri, yeni yaşayış məntəqələrinin salınması, infrastruktur layihələrinin həyata keçirilməsi Azərbaycanın müharibədən sonrakı inkişaf strategiyasının əsas istiqamətlərindəndir. Türkiyə ilə əməkdaşlıq da bu prosesdə mühüm yer tutur.
Əminliklə demək olar ki, 8 Noyabr 2026-cı il tarixində Türkiyə Prezidentinin Azərbaycana səfəri iki qardaş xalqın ortaq sevincinin, tarixi yaddaşının və gələcəyə yönəlmiş əməkdaşlığının növbəti ifadəsidir.



Zəfər Günü Azərbaycan xalqının qəhrəmanlıq salnaməsi, Türkiyə ilə birlik və həmrəyliyimiz isə bu salnamənin mühüm mənəvi səhifələrindən biridir. Bu qardaşlıq bağlarının qorunması və gələcək nəsillərə ötürülməsi hər iki xalqın ortaq mənəvi dəyərlərindən irəli gələn mühüm vəzifədir.
Zəfərimiz əbədi, Azərbaycan-Türkiyə qardaşlığı daim möhkəm olsun!

Dilqəm Quliyev,
pedaqogika üzrə elmlər doktoru,
professor