Bakı İctimai Əməkdaşlıq Mərkəzinin sədri Rauf Zeyni QHT.az-a açıqlamasında bildirib ki, təşkilat əvvəllər Bakı Respublika Təlim Mərkəzi, daha sonra isə Respublika Təlim Mərkəzi adı ilə fəaliyyət göstərib.

Son illərdə isə fəaliyyət istiqamətləri genişlənərək ictimai iştirakçılığın və ictimai nəzarətin artırılması, şəffaflığın gücləndirilməsi, eləcə də korrupsiyaya qarşı mübarizə sahəsində QHT–hökumət əməkdaşlığının möhkəmləndirilməsinə yönəlib:

"İctimai Nəzarət Mərkəzi kimi fəaliyyət göstərərək bu istiqamətlərdə ictimai müzakirələr və görüşlər təşkil edirik. Müxtəlif vətəndaşlardan daxil olan müraciətlər əsasında onların problemlərinin həlli ilə bağlı məsələləri Bakı İctimai Əməkdaşlıq Mərkəzi olaraq aidiyyəti qurumlara yönləndiririk. Çalışırıq ki, il ərzində bu istiqamətdə fəal fəaliyyət göstərək, həm qeyri-hökumət təşkilatlarına müəyyən dəstək verək, həm də vətəndaşlarımızın problemlərinin həllinə töhfə verək. İmkanlarımız daha da genişləndikcə, bu sahədə fəaliyyətimizi artırmağı nəzərdə tuturuq".

Mərkəz sədri vurğulayıb ki, bu yanaşma uzun illər vətəndaş cəmiyyətinə xidmət etmiş, zəngin təcrübəyə malik şəxslər üçün xüsusilə əhəmiyyətlidir:

"Məqsədimiz həm ölkəmizin, həm vətəndaş cəmiyyətinin inkişafına, bütövlükdə isə dövlətimizin güclənməsinə daha çox töhfə verməkdir. Məşhur bir şüarımız var və onu bir daha təkrar etmək istəyirəm: “Kamil vətəndaş, sivil cəmiyyət, güclü dövlət."