Milli Məclisin iqtisadçı deputatı Vüqar Bayramov Prezident İlham Əliyevin aztəminatlı ailələrə 200 manat birdəfəlik maddi yardım verilməsi ilə bağlı imzaladığı sərəncamın icra mexanizmlərinə aydınlıq gətirib.

Deputat bildirib ki, bu qərar bir daha göstərir ki, dövlətin sosial siyasətində əsas prioritet vətəndaşların rifahının yaxşılaşdırılması və sosial təminat mexanizmlərinin gücləndirilməsidir.

Vüqar Bayramovun sözlərinə görə, 200 manatlıq birdəfəlik maddi yardım hazırda aktiv ünvanlı dövlət sosial yardımı alan ailələrə şamil olunacaq. Bu kateqoriyaya daxil olan ailələrin sayı təxminən 76 min təşkil edir.

Deputat qeyd edib ki, yardımın alınması üçün vətəndaşların heç bir əlavə müraciət etməsinə ehtiyac yoxdur. Ödənişlər mövcud elektron baza əsasında proaktiv qaydada həyata keçiriləcək.

Onun sözlərinə görə, ünvanlı sosial yardım alan ailələr üçün yeni bank kartı açılmayacaq, 200 manatlıq vəsait artıq istifadə olunan mövcud kartlara köçürüləcək.

Vüqar Bayramov vurğulayıb ki, bu birdəfəlik yardım yalnız ünvanlı dövlət sosial yardımı alan ailələrə aiddir. Digər sosial proqramların iştirakçıları bu ödənişdən yararlana bilməyəcəklər. Deputat onu da bildirib ki, ünvanlı sosial yardıma müraciət etmiş, lakin hələlik yardım təyin olunmamış ailələrə 200 manatlıq ödəniş şamil edilmir. Yardım yalnız artıq ünvanlı sosial yardım təyin edilmiş ailələr üçün nəzərdə tutulub.

Onun sözlərinə görə, sözügedən sərəncam bayram ərəfəsində aztəminatlı ailələrin maddi durumuna əlavə dəstək məqsədi daşıyır və sosial həssas əhali qruplarının qorunmasına xidmət edir.