IV Şuşa Qlobal Media Forumunda Prezident cənab İlham Əliyev tərəfindən səsləndirilən fikirlər bir daha onu göstərdi ki, bu gün Azərbaycan artıq təkcə enerji ixrac edən ölkə deyil. Ölkəmiz Avropa ilə Asiyanı birləşdirən etibarlı nəqliyyat qovşağı, enerji təhlükəsizliyinin əsas tərəfdaşlarından biri və regional sabitliyin mühüm iştirakçısıdır.

Ən diqqətçəkən məqamlardan biri isə orta güc anlayışı ilə bağlı idi. Müasir dünyada dövlətin gücü yalnız əhalisinin sayı və ya iqtisadiyyatının həcmi ilə ölçülmür. Əsas meyar milli maraqları müstəqil şəkildə müdafiə etmək, regional proseslərə təsir göstərmək və dünyada etibarlı tərəfdaş kimi qəbul olunmaqdır.

Azərbaycan bu gün 16 ölkəyə təbii qaz ixrac edir və Avropanın enerji təhlükəsizliyində mühüm rol oynayır, Orta Dəhlizin əsas logistika mərkəzlərindən birinə çevrilir, Şərqlə Qərb, Şimalla Cənub arasında etibarlı bağlantı platforması yaradır və Qarabağda bərpa və yenidənqurma işlərini dünyanın diqqətinə təqdim edir.

Şuşa artıq yalnız tariximizin və mədəniyyətimizin simvolu deyil. Bu şəhər qlobal dialoqun, beynəlxalq əməkdaşlığın və Azərbaycanın artan geosiyasi rolunun nümayiş olunduğu mühüm platformaya çevrilib.

Dünyada siyasi və iqtisadi balansların sürətlə dəyişdiyi bir dövrdə Azərbaycanın ən böyük üstünlüyü etibarlı tərəfdaş, praqmatik siyasət yürüdən və uzunmüddətli strateji baxışa malik dövlət kimi qəbul edilməsidir. Bu, dövlət başçısı cənab İlham Əliyevin çox böyük uğurudur. Məhz bu amil ölkəmizin beynəlxalq mövqeyini ildən-ilə daha da gücləndirir.


Tahir Mirkişili,
Millət vəkili, Milli Məclisin İqtisadi siyasət, sənaye və sahibkarlıq komitəsinin üzvü