Azərbaycan Milli Qeyri-Hökumət Təşkilatları Forumunun (AMQF) təşkilatçılığı ilə “NGO Tech Talks” ekspertlərlə təcrübə mübadiləsi sessiyası keçirilib.

Sessiyada vətəndaş cəmiyyəti təşkilatlarının rəqəmsallaşması, müasir texnologiyalardan istifadə imkanları və QHT-lərin kibertəhlükəsizliyinin təmin olunması məsələləri ətrafında fikir mübadiləsi aparılıb.
Tədbirdə AKTA-nın icraçı direktoru Rauf Cabarov “QHT-lər üçün praktiki kibertəhlükəsizlik qaydaları və Cybersecurity Checklist” mövzusunda təqdimatla çıxış edib. O, QHT-lərin rəqəmsal mühitdə qarşılaşa biləcəyi əsas risklər, fişinq və sosial mühəndislik hücumlarından qorunma üsulları, şübhəli keçid və elektron əlavələrin müəyyənləşdirilməsi, həmçinin məlumatların ehtiyat nüsxələrinin yaradılması ilə bağlı praktiki tövsiyələrini bölüşüb.
Sessiyada Müasir İnternet Resurslarının İnkişafı İctimai Birliyinin sədri Zamin Zeynal da çıxış edib. O, QHT-lərin sosial media platformalarında aktiv və təhlükəsiz hesablarının olmasının müasir informasiya mühitində mühüm əhəmiyyət daşıdığını vurğulayıb.
Zamin Zeynal bildirib ki, QHT-lərin rəqəmsal imkanlarının genişləndirilməsi ilə yanaşı, onların kibertəhlükələrdən qorunması üçün praktiki və əlçatan dəstək mexanizmlərinin yaradılması da vacibdir.
“Rəqəmsal biliklərin artırılması fonunda ixtisaslaşmış qurumlar tərəfindən QHT-lərə ictimai əsaslarla peşəkar İKT xidmətlərinin göstərilməsi olduqca əhəmiyyətlidir. Belə xidmətlər QHT-lərin sosial media hesablarının və digər rəqəmsal resurslarının təhlükəsizliyinin təmin olunmasına, kibertəhdidlərin qarşısının alınmasına və ümumilikdə vətəndaş cəmiyyəti institutlarının rəqəmsal dayanıqlığının artırılmasına mühüm töhfə verə bilər”, – deyə Zamin Zeynal qeyd edib.
Tədbir çərçivəsində QHT nümayəndələrinin rəqəmsal texnologiyalardan daha səmərəli istifadəsi, kibertəhlükəsizlik üzrə bilik və bacarıqlarının artırılması, eləcə də bu sahədə ekspert dəstəyinin gücləndirilməsi istiqamətində əməkdaşlığın əhəmiyyəti vurğulanıb.