“Xankəndində seprataçıların “rəhbəri” Arutunyan “Təhlükəsizlik Şurasının” iclasında çıxış edib. Bu çıxış Ermənistanda müxalifyönlü deputatlar və bir çox politoloqlar tərəfindən kəskin tənqid olunub. Arutunyan qeyd edib ki, “İrəvanla bizim mövqeyimiz arasında fərq olduğunu təsəvvür edə bilmirəm. İrəvan Qarabağ məsələsinə gəldikdə, “Qarabağ hakimiyyətinin” mövqeyinə əsaslanır”. Müxalif deputatlar, politoloqlar deyir ki, “belə çıxır ki, Ermənistan hakimiyyətinin beynəlxalq birlik nöqteyi-nəzərindən Qarabağ Azərbaycanın tərkib hissəsidir. Paşinyan və ona yaxın deputatlar, siyasilər bunu bir neçə dəfə səsləndirib. Qeyd edilib ki, Qarabağın Azərbaycanın tərkibində gələcəyi ola bilər. Müxalif deputatlar və siyasilər, separatçılara və Qarabadağdakı vətəndaşlarımıza müraciət ediblər ki, Arayikin bu bəyanatı ilə bağlı aydın mövqe bildirilməlidir”.
Bu barədə Bizimyol.info xəbər portalına Milli Məclisin deputatı Vüqar İskəndərov danışıb. Onun sözlərinə görə, Prezident İlham Əliyevin zərgər dəqiqliyi ilə düşünülmüş siyasətinin nəticəsində həm bölgədə seprataçılar, həm rəsmi İrəvan anlamağa başlayır ki, onların Azərbaycanın tərkibində yaşamaqdan başqa çıxış yolları yoxdur. Çünki həm beynəlxalq hüquq, onun norma və prinsipləri, həm Azərbaycan Konstitusiyası həmin ərazini Azərbaycanın tərkib hissəsi sayır. Bu ərazilər Azərbaycanın əzəli, qədim torpaqlarıdır və ora köçürülən ermənilər artıq uzun müddətdir ki, orada yaşayırlar. Onların hər biri Azərbaycanda yaşayan digər azlıqlar kimi Azərbaycanın vətəndaşlarıdır.

Deputat bildirib ki, onların reinteqrasiya məsələsinə də ölkəmiz tərəfindən start verilib.

“Arayik və digər separatçılar, ara-sıra bir-birinə əks və yaxud ikibaşlı bəyanatlar verirlər. Əslinə qalsa, bu fikirlərinin kökündə artıq Qarabağdakı digər “siyasiləri” və əhalinin həmin məsələyə hazırlamağa köklənib. Çünki Arayikin başqa çıxış yolu yoxdur. O, artıq anlayır ki, Paşinyan hakimiyyəti bütün gerçəklikləri bilir. O, həqiqətən də Qarabağda yaşayan 15-20 min erməniyə görə, 3 milyona yaxın Ermənistanda yaşayan ermənilərin taleynə biganə qala bilməz”,- deyən deputat qeyd edib ki, artıq “Qarabağ məsələsi” Ermənistan toplumunu çoxdan bezdirib. Çünki “Qarabağ məsələsi” ilə 30 ilə yaxın siyasilər, digər cinayətkarlar, cəlladlar, siyasi manipulyasiya edərək hakimiyyətə gəliblər. Uzun illər ərazində Ermənistanın yeraltı və yerüstü sərvətlərini talan edərək, ölkəni viran qoyublar.

Hazırda Ermənistan düşdüyü bataqlıqdan çıxa bilmir. Bunu anlayan Paşinyan sağa-sola vurnuxsa da başa düşür ki, İlham Əliyev siyasətinin qarşısında acizdir. Onun indiki siyasəti Azərbaycanla sülh müqaviləsi imzalamaq, sərhədləri tanıyandan sonra kommunikasiyanın açılması ilə bir növ ölkəsinə nəfəslik açmaq və gələcək inkişafında hansısa bir dəstəyin alınmasına hesablanıb.

“Paşinyan birneçə dəfə beynəlxalq tədbirlərdə və öz ölkəsində səsləndirib ki, beynəlxalq hüquqla, yurisdiksiya ilə həmin ərazilər Azərbaycanın tərkib hissəsi sayılır. O, bildirib ki, nə söyləsələr də, bu ərazilər defakto, beynəlxalq hüquqla Azərbaycanın ərazisidir”-deyən deputat hesab edir ki, Arayikin çıxışı həm də, xalqı bu məsələyə hazırlamaqdır. Onun fikrincə, əslinə qalsa Ermənistan bugünkü ikibaşlı siyasətlə, bu sövdələşmələrdən nəsə əldə etməyə çalışır. Lakin yaxşı da bilir ki, şahmat taxtasının üzərində olan mahir oyunçu İlham Əliyevdir...