27 sentyabr 2020-ci il tarixində Ermənistan silahlı qüvvələrinin cəbhə xəttində növbəti təxribatına cavab olaraq Azərbaycan əks-hücum əməliyyatına başladı
44 günlük Vətən müharibəsində Azərbaycan xalqının, hökumətinin və ordusunun birliyi düşməni diz çökdürdü. Prezident, Silahlı Qüvvələrin Ali Baş Komandanı İlham Əliyevin qətiyyətli siyasəti sayəsində dəmir yumruq kimi birləşən Azərbaycan xalqı bütün dünyaya özünün gücünü göstərərək Ermənistan ordusunun “məğlubedilməzliyi” mifini darmadağın etdi. Və bu gün bütün dünya Azərbaycan əsgərlərinin qəhrəmanlığından danışır. Bu qələbə Azərbaycan xalqının həmrəyliyinin, müstəqil Azərbaycanın iqtisadi qüdrətinin, Azərbaycan övladlarının qəhrəmanlığının, qorxusuzluğunun, əzmkarlığının və mərdliyinin təntənəsi idi. Artıq dörd il yaxındır ki, 44 günlük Zəfər müharibəsi ilə Azərbaycan 30 illik erməni işğalına son qoydu, öz ərazi bütövlüyünü və dövlət suverenliyini təmin etdi. Ali Baş Komandan, Prezident İlham Əliyevin qətiyyətli sərkərdə kimi yürütdüyü əzmkar siyasət və igid oğullarımızın dillərə dastan olan qəhrəmanlığı sayəsində bu gün Azərbaycan doğma Qarabağa, Laçına, Şuşaya, Xankəndiyə qovuşdu. Artıq doğma-yurd yuvalarına qayıdan insanlar, dinc quruculuq üçün çalışırlar. İndi sülh zamanıdır. Azərbaycan və Ermənistan arasında bağlanacaq sülh müqaviləsi!
Bəs nədən Azərbaycanın sülh təşəbbüslərinə rəğmən acı məğlubiyyətə uğrayan, sosial böhranla çabalayan Ermənistan sülh müqaviləsini ləngidir?. İlk növbədə ona görə ki, Fransa prezidenti Emannuel Makron başda olmaqla bir sıra qərb dairələri, - bura “Sülh Fondu”nun əli ilə Ermənistanı silahlandırmağa qərar verən Avropa İttifaqı da daxildir - var gücləri ilə bölgədə sülhün və iqtisadi dirçəlişin baş verməməsi üçün çalışırlar. Görün situasiya nə eybəcər hal alıb ki, Aİ “Sülh fondu”nun əli ilə Ermənistanı silahlandırmaq kimi həyasızlığa əl atır. Amma anlamadıqları və dərk edə bilmədikləri bir fakt ortadadır: Cənubi Qafqazda təhlükəsizliyi və sülhü təmin edəcək yeganə güc Azərbaycandır. Regionun lider ölkəsi olan Azərbaycan bölgənin inkişafı, tərəqqisi, gələcəyi naminə Ermənistan ilə normallaşmaya tez bir zamanda nail olunması üçün bütün mümkün addımları atır, əməli fəaliyyət göstərir.
Prezident İlham Əliyev dəfələrlə çıxışlarında bildirir ki, Azərbaycan sülh prosesinə sadiqdir. Məhz, biz ikinci Qarabağ müharibəsi başa çatdıqdan sonra sülh danışıqları təşəbbüsü ilə çıxış etdik. Əslində, biz sülh yolu ilə həllin 5 əsas prinsipini işləyib hazırladıq və sülh müqaviləsinin mətninin layihəsini təqdim etdik. Beləliklə, biz əgər sülh istəmiriksə niyə bunların hamısını hazırlamışıq?! Bir sözlə Azərbaycan sülhə, sülh danışıqlarına sadiqdir və sülh danışıqları ilə bağlı mövqeyimiz aydındır, məntiqlidir, beynəlxalq hüquqa əsaslanır. Çünki Azərbaycan öhdəliklərinə də sadiq ölkədir. Və əgər Ermənistan həqiqətən sülh istəyirsə, öhdəliklərinə tam şəkildə əməl etməli və ikitərəfli danışıqlar formatında Azərbaycanla razılığa gəlməlidir. Çünki bu gün diktəni edən qalib ölkə və qalib ölkənin Qalib Lideri Prezident İlham Əliyevdir və Onun dediyi söz imzası qədər keçərlidir.
Lakin Azərbaycanın siyasi, diplomatik müstəvidə sülh istiqamətində atdığı addımlara qarşı tərəf nəinki adekvat cavab verir, əksinə, sülhdən yayınmaq üçün hər cür siyasi, hərbi təxribatlara əl atır. Sözsüz ki, qərbdəki “ağıl mərkəzləri”nin təhriki ilə!
Dünyaşöhrətli yazıçı Viktor Hüqo yazır ki, “sülh sivilizasiyanın fəziləti, müharibə isə onun cinayətidir”. Təbii ki, bölgəmizdə sülhün yaranması ilk növbədə bizim istəyimizdir. Cənubi Qafqazın son 30 il tarixinə diqqət yetirmək kifayətdir ki, Qafqazda kimin fəzilətli, kimin isə cinayətkar dövlət olması aydın olsun. Azərbaycan daima bütün mübahisə və münaqişələrin dinc yolla həll edilməsinin tərəfdarı olub. 44 günlük Vətən müharibəsində misilsiz qələbə qazanmaqla yanaşı, sülh təklif edən tərəf məhz Azərbaycan olub. Otuz ildir işğala, dağıntılara, etnik təmizləməyə, soyqırımına məruz qalan və ərazisinin tamamilə dağıdılmasından əziyyət çəkən bir ölkə torpaqlarını beynəlxalq vasitəçilər olmadan məhz özü azad etdikdən dərhal sonra özü sülh təklif edib. Azərbaycan hər zaman konstruktiv mövqelərdən çıxış edib. Azərbaycan tərəfi bildirib ki, sülh sazişi imzalamalıyıq və delimitasiya ilə bağlı komissiyalarımız olmalıdır. Ermənistan deyil, Brüssel deyil, Vaşinqton, Paris və ya Moskva deyil, bunu deyən və edən Azərbaycan olub. Azərbaycan Prezidenti Ermənistanı sülh və savaş arasında prinsipial seçim etməyə çağırır. Sülh sazişi imzalanana qədər sülh vəziyyətinin olmayacağını bəyanlayır. Yəni, Ermənistan sülh istəyirsə, sülh sazişini mütləq ən qısa zaman ərzində imzalamalıdır. Bəli, həqiqət budur ki, qalib tərəf kimi Azərbaycan sülh sazişinin imzalanması üçün əlindən gələni, öhdəsinə düşəni reallaşdırmağa tam hazır vəziyyətdədir. Yəni Azərbaycan Prezidenti Vətən müharibəsində əldə edilən zəfərdən sonra bölgədə sülh və əməkdaşlığa nail olmaq üçün postmüharibə dövründə də sülh kontekstində regionla bağlı çətin geosiyasi maraqlar şəraitində diplomatik liderliyini, məharətini sərgiləməyə davam edir. Savaşdan sonra hərbi potensialını gündən-günə gücləndirən, sərhəddəki mövqelərini daha da möhkəmləndirən Azərbaycan sülhün, qarşılıqlı olaraq bir-birlərinin ərazi bütövlüyünü tanıyaraq Cənubi Qafqazda sabitliyin bərqərar olması üçün addımlar atır. Bununla yanaşı, prosesin alternativinin nə ilə nəticələnəcəyini də Ermənistana göstərməklə deyir ki, sülh sazişinin imzalanmaması Ermənistan üçün böyük fəlakət olacaq: Ya 5 prinsipi qəbul edib sülh sazişi imzalanmalı, ya da "Dəmir yumruq" yenidən işə düşməlidir.
Beləliklə, bütün bunlar onu göstərir ki, regionda vəziyyətə diktə edən tərəf Azərbaycandır və ölkəmizin atdığı addımlar beynəlxalq hüquqa əsaslanır. Və Azərbaycan öz sülh təşəbbüslərinə adekvat cavab tələb edir və bizim buna tam haqqımız çatır. Çünki haqq-ədalət də, beynəlxalq hüquq da bizim tərəfimizdədir. Biz heç kimin ərazisinə göz dikmirik və öz halal torpaqlarımızın bir qarışını da heç kəsə verməyəcəyik. Bu nailiyyətlər isə Prezident, Ali Baş Komandan İlham Əliyevin böyük sərkərdəlik məharəti, güclü iradəsi və qətiyyəti, nəhayət diplmatik siyasətinin reallığıdır.
ZƏRİFƏ QULİYEVA,
YAP Veteranlar Şurasının üzvü, “Modern İnkişaf və Ailə” İctimai Birliyinin sədri
