Azərbaycan ilə İsrail arasında ikitərəfli münasibətlərin gücləndirilməsi regional sabitliyin təmin edilməsində müsbət rol oynaya bilər.

Millixəbər.az xəbər verir ki, bu barədə Atlantik Şurasının aparıcı eksperti Ariel Koen AZƏRTAC-ın saytında yayımlanan “Azərbaycan və dünya” proqramının son buraxılışında bildirib.

O qeyd edib ki, Azərbaycan, Türkiyə və ya Rusiyadan fərqli olaraq, İsrail regionda əsas aktor deyil, lakin davamlı olaraq Azərbaycanpərəst və Qərbpərəst mövqeyini qoruyur. Ekspert hesab edir ki, İsrailin Türkiyə ilə münasibətləri mürəkkəb olaraq qalır və bu kontekstdə Azərbaycan mühüm vasitəçi rolu oynaya bilər.

İsrail və Suriya nümayəndələri arasında danışıqların əvvəllər Bakıda keçirildiyini xatırladan Koen qeyd edib ki, heç bir tərəf münaqişənin qızışmasında maraqlı deyil və Azərbaycan bu prosesdə “müsbət sülhməramlı amil” kimi çıxış edir.

Ekspert, həmçinin Azərbaycanın sərhədlərindən cənubda və şərqdə davam edən qeyri-sabitliyi qeyd edib ki, bu da İsrailin təhlükəsizliklə bağlı narahatlığını artırır. O, bu baxımdan iki ölkə arasında əməkdaşlığın, informasiya mübadiləsinin və koordinasiyanın dərinləşdirilməsinin sabitlik səviyyəsini yaxşılaşdıra və regionda sülh şanslarını artıra biləcəyini vurğulayıb.