“Gedirlər xarici dərman firmalarından sifariş edirlər, tapşırıq da verirlər ki, faizi az olsun, gələn pulu da qoyurlar ciblərinə”.

Bunu deputat Kəmaləddin Qafarovun Milli Məclisin Səhiyyə Komitəsinin bu gün keçirilən iclasında Azərbaycanda dərmanların qiymətinin Türkiyədən daha ucuz olması ilə bağlı sözlərinə münaisbət bildirən Müasir Müsavat Partiyasının (MMP) sədri Hafiz Hacıyev Yenicag.az-a açıqlamasında deyib.

Hafiz Hacıyev bildirib ki, Azərbaycanda dərman bazarı da monopoliyadadır:

“Kəmaləddin Qafarov çox səhv danışır. Azərbaycandakı dərmanlar Türkiyədən 5 dəfə bahadır və keyfiyyətsizdir. Alıblar hər şeyi monopoliyaya, dövləti talan eləyirlər. Utanmırlar, dilləri də var danışmağa… Baş qaxıncısınız.

Millət sizin üzünüzə baxmaqdan bezib. Sizin adınız gələndə camaatın mədəsi bulanır. Mən özüm xəstəyəm. Ankarada müalicə alıram, dərmanları da ordan əldə edirəm.

Buradakı dərmanların keyfiyyəti yoxdur. Gedirlər xarici dərman firmalarından sifariş edirlər, tapşırıq da verirlər ki, faizi az olsun, gələn pulu da qoyurlar ciblərinə. Kəmaləddinə deyirəm ki, boşboğazlıq eləməsin. Sənin arxanda bilirəm kimlər dayanıb. Sizin xalq içinə çıxmağa haqqınız yoxdur”.