Xırdalan şəhərində gənclərin sağlam həyat tərzinə yönəldilməsi və narkomaniyaya qarşı mübarizəyə həsr olunan növbəti maarifləndirici tədbir keçirilib. “Narkomaniyaya qarşı mübarizəyə dair Yaddaş Təlimatı” mövzusunda təşkil olunan görüş Abşeron Rayon İcra Hakimiyyəti və Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının birgə təşkilatçılığı ilə baş tutub.

Tədbir “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı” çərçivəsində həyata keçirilib. RİH-nin inzibatı binasında baş tutan görüşdə Abşeron Rayon İcra Hakimiyyəti başçısının müavini, Abşeron RİH yanında “Narkomanlığa və narkotik vasitələrin qanunsuz dövriyyəsinə qarşı mübarizə üzrə” rayon komissiyasının sədri Gülnar Rəhimova, Dövlət Komissiyasının məsul əməkdaşı Vasif Quliyev, Rayon Ağsaqqallar Şurasının sədri, şəhid atası Məhərrəm İbadov, DİN-in Baş Narkotiklərlə Mübarizə İdarəsinin təhqiqat qrupunun rəisi, polis mayoru Nəcəf Aydınoğlu, Sumqayıt şəhər Narkoloji Mərkəzinin direktoru Vüsal Cabbarov, rayonun komissiyanın üzvləri, QHT rəhbərləri, eləcə də rayonun ümumtəhsil müəssisələrinin təlim-tərbiyə işləri üzrə direktor müavinləri, uşaq birliklərinin rəhbərləri, psixoloqlar və valideynlər iştirak ediblər.
İlk olaraq Ümummilli lider Heydər Əliyev və Azərbaycanın ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib

Gülnar Rəhimova çıxışında vurğulayıb ki, narkomaniya təkcə fərdi deyil, bütövlükdə cəmiyyətin mənəvi və sosial sağlamlığı üçün ciddi təhlükə yaradan bəladır. Onun sözlərinə görə, Prezident İlham Əliyevin rəhbərliyi ilə həyata keçirilən dövlət siyasətinin əsas məqsədlərindən biri gənclərin sağlam, bilikli və məsuliyyətli vətəndaş kimi formalaşmasını təmin etməkdir. Bu istiqamətdə Abşeron rayonunda müvafiq qrumlarla birgə ardıcıl şəkildə profilaktik və maarifləndirici tədbirlər həyata keçirilir.

Dövlət Komissiyasının məsul əməkdaşı Vasif Quliyev çıxışında narkomaniya ilə mübarizədə cəmiyyətin bütün təbəqələrinin birgə fəaliyyətinin önəmini qeyd edərək, ailə, məktəb və cəmiyyətin birgə əməkdaşlığı ilə bu istiqamətdə mühüm rol oynadığını diqqətə çatdırıb. O bildirib ki, narkotik vasitələrin dövriyyəsinə qarşı effektiv mübarizə yalnız hüquq-mühafizə orqanlarının deyil, hər bir vətəndaşın mənəvi borcudur.

DİN-in Baş Narkotiklərlə Mübarizə İdarəsinin təhqiqat qrupunun rəisi, polis mayoru Nəcəf Aydınoğlu narkotik vasitələrin qanunsuz dövriyyəsi ilə bağlı statistik göstəriciləri diqqətə çatdırıb. O, eyni zamanda, hüquq-mühafizə orqanlarının bu sahədə həyata keçirdiyi əməliyyat tədbirləri, eləcə də qabaqlayıcı fəaliyyətlər haqqında məlumat verib.

Sumqayıt şəhər Narkoloji Mərkəzinin direktoru Vüsal Cabbarov çıxışında bəşəriyyət üçün ən təhlükəli bəla olan narkomaniyanın gənclər və yeniyetmələr arasında daha çox yayılma təhlükəsindən, sağalmaz xəstəliklərə düçar edən bu dəhşətli bəlanın vurduğu zərərlərdən, törətdiyi fəsadlardan geniş bəhs edərək, iştirakçılara gəncləri zərərli vərdişlərdən qorumağı tövsiyə edib.
Tədbir iştirakçıları çıxış edərək gənclərin sağlam mühitdə böyüməsi, ailə nəzarətinin gücləndirilməsi və məktəblərdə maarifləndirici tədbirlərin sayının artırılması ilə bağlı fikirlərini bildiriblər.

Görüşün sonunda iştirakçılara buklet və “Narkotik vasitələrdən və psixotrop maddələrdən sui-istifadə edən şəxslərin müəyyənləşdirilməsinə kömək üçün metodik tövsiyələr” vəsaiti təqdim olunub.