Şəhidlərin qanı ilə yazılan Zəfər salnaməsi gələcək nəsillərə əmanətdir

2020-ci il sentyabrın 27-də başlayan və 44 gün davam edən İkinci Qarabağ müharibəsi Azərbaycanın müasir tarixinin ən mühüm hadisələrindən biri olmaqla yanaşı, xalqımızın milli həmrəyliyinin, dövlətçilik iradəsinin və Ordumuzun döyüş qabiliyyətinin nümayişinə çevrildi.
“Dayaq Vətən Müharibəsi və Şəhid Ailələrinə Dəstək Təşkilatı”nın sədr müavini Məcid Məmmədov bildirib ki, Vətən müharibəsi Azərbaycanın ərazi bütövlüyünün bərpası istiqamətində mühüm tarixi mərhələ olmaqla, xalqımızın Vətən sevgisinin və milli birliyinin parlaq nümunəsidir.
Onun sözlərinə görə, 2020-ci ilin payızında Azərbaycan Ordusunun hər bir mənsubu qarşıya qoyulan tarixi vəzifənin yerinə yetirilməsi üçün böyük fədakarlıq göstərib. Əsgərdən yüksək rütbəli zabitədək hər bir hərbçinin göstərdiyi qəhrəmanlıq və şücaət 44 günlük müharibənin nəticələrində mühüm rol oynayıb.
Məcid Məmmədov qeyd edib ki, Azərbaycan xalqı Vətən müharibəsində şəhid olanların və sağlamlığını itirən qazilərin fədakarlığını heç zaman unutmur:
“Qədirbilən xalqımız müqəddəs Vətən uğrunda canından keçən şəhidlərimizin xatirəsini daim uca tutur. Şəhid ailələrinə diqqət və qayğı dövlət siyasətinin mühüm istiqamətlərindən biridir. Bizim əsas vəzifələrimizdən biri də şəhid ailələrinin, müharibə iştirakçılarının və qazilərin yanında olmaq, onların üzləşdiyi məsələlərin həllinə ictimai dəstək göstərməkdir”.
Təşkilat sədrinin müavini vurğulayıb ki, Vətən müharibəsinin nəticəsi yalnız hərbi əməliyyatların nəticəsi kimi qiymətləndirilməməlidir. Bu Qələbənin arxasında Azərbaycan cəmiyyətinin müxtəlif təbəqələrini birləşdirən milli həmrəylik dayanırdı.
“44 günlük müharibə zamanı cəmiyyətimizin bütün təbəqələri vahid məqsəd ətrafında birləşdi. Ön və arxa cəbhənin, hərbçi ilə mülki vətəndaşın, ölkə daxilində yaşayan insanlarla xaricdəki soydaşlarımızın həmrəyliyi Vətən müharibəsinin mühüm ictimai-siyasi reallıqlarından biri idi. Bu birlik xalqımızın dövlətçilik ənənələrinə və milli iradəsinə bağlılığını bir daha göstərdi”, - deyə Məcid Məmmədov bildirib.
Onun fikrincə, Vətən müharibəsindən sonrakı dövrdə Azərbaycan Ordusunun inkişaf etdirilməsi və yeni reallıqlara uyğun olaraq hərbi potensialın gücləndirilməsi dövlət siyasətinin prioritet istiqamətlərindən biri kimi diqqətdə saxlanılıb. Peşəkar komando birliklərinin yaradılması və ordunun müasir tələblər əsasında təkmilləşdirilməsi Azərbaycanın müdafiə qabiliyyətinin daha da möhkəmləndirilməsinə xidmət edib.
Məcid Məmmədov bildirib ki, 2023-cü ilin sentyabrında keçirilən lokal xarakterli antiterror tədbirləri Azərbaycanın ərazi bütövlüyünün və suverenliyinin tam bərpası baxımından mühüm mərhələ oldu. Bununla da ölkənin bütün ərazisində dövlət suverenliyinin təmin olunması üçün yeni mərhələ başladı.
“2020-ci ildə əldə olunan tarixi Zəfərdən sonra qarşıda duran əsas məsələlərdən biri ölkənin ərazi bütövlüyünün tam təmin edilməsi idi. 2023-cü ilin sentyabrında həyata keçirilən tədbirlər nəticəsində Azərbaycanın bütün ərazisində dövlət suverenliyi bərpa olundu. Bu hadisə ölkəmizin müasir tarixində mühüm dönüş nöqtəsi kimi yadda qaldı”, - deyə o qeyd edib.
Təşkilat rəsmisi vurğulayıb ki, əldə olunan nəticələr Azərbaycan xalqının yaddaşında yalnız hərbi Qələbə kimi deyil, həm də milli həmrəyliyin, dövlətçilik düşüncəsinin və Vətənə bağlılığın nümunəsi kimi qalacaq.
Onun sözlərinə görə, bu gün əsas vəzifələrdən biri Vətən müharibəsinin tarixi əhəmiyyətinin gələcək nəsillərə düzgün çatdırılması, şəhidlərin əziz xatirəsinin yaşadılması və onların ailələrinə göstərilən diqqət və qayğının davam etdirilməsidir.
“Şəhidlərimizin həyat yolu və döyüş salnaməsi gənc nəslin vətənpərvərlik ruhunda tərbiyəsində mühüm örnəkdir. Biz onların adlarını yaşatmaqla, şəhid ailələrinə və qazilərimizə dəstək göstərməklə Vətən qarşısında borcumuzu yerinə yetirməyə çalışırıq. Bu, yalnız dövlətin deyil, bütövlükdə cəmiyyətin məsuliyyətidir”, - deyə Məcid Məmmədov bildirib.
Məcid Məmmədov qeyd edib ki, sentyabrın 27-nin Anım Günü kimi qeyd olunması Vətən müharibəsində canından keçən qəhrəmanların xatirəsinə ehtiramın ifadəsidir. Bu tarix xalqımızın yaddaşında şəhidlərin müqəddəs xatirəsi, milli birlik və Vətən sevgisi ilə bağlı xüsusi məna daşıyır.
Vətən müharibəsindən ötən beş il ərzində Azərbaycan xalqının qarşısında yeni inkişaf və quruculuq mərhələsi açılıb. Qarabağ və Şərqi Zəngəzurda həyata keçirilən genişmiqyaslı bərpa və quruculuq işləri, keçmiş məcburi köçkünlərin doğma yurdlarına qayıdışı və regionun sosial-iqtisadi inkişafı postmüharibə dövrünün əsas istiqamətlərindəndir.
Məcid Məmmədovun sözlərinə görə, Vətən müharibəsi ilə qazanılan tarixi nəticələrə hörmətin ən mühüm göstəricilərindən biri şəhid ailələrinin və qazilərin daim diqqət mərkəzində saxlanılması, onların sosial rifahının yaxşılaşdırılması və cəmiyyətə inteqrasiyasının dəstəklənməsidir.
Beləliklə, 2020-ci ilin 44 günlük Vətən müharibəsi Azərbaycanın dövlətçilik tarixində mühüm iz qoymaqla yanaşı, xalq-dövlət-ordu birliyinin gücünü nümayiş etdirdi. Bu tarixi hadisədən beş il sonra şəhidlərin əziz xatirəsi ehtiramla yad edilir, qazilərin qəhrəmanlığı yüksək qiymətləndirilir, Vətən müharibəsinin tarixi dərslərinin gələcək nəsillərə çatdırılması istiqamətində işlər davam etdirilir.

Millixeber.az