Oktyabrın 7-də Balakən rayonu N.Davudov adına Şərif 1 nömrəli kənd tam orta məktəbində Balakən Rayon İcra Hakimiyyətinin və Rayon Polis Şöbəsinin birgə təşkilatçılığı ilə “Narkomaniya və dini radikalizmə qarşı mübarizə” adlı maarifləndirmə tədbiri keçirilib.

Millixəbər.az-ın məlumatına görə,tədbiri giriş sözü ilə açan Balakən RİHB-nın birinci müavini, Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon Komissiyasının sədri Turan Dibirov Azərbaycan Respublikasi Prezidenti cənab İlham Əliyevin 17 sentyabr 2025-ci ildə imzaladığı “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı”nın təsdiq edilməsi barədə Sərəncamdan irəli gələn vəzifələr haqqında tədbir iştirakçılarına ətraflı məlumat verib, müasir dövrdə ölkəmizdə narkomaniya ilə mübarizə sahəsində görülən işlərdən danışıb. Həmçinin Komissiyanın rayonda bu sahədə apardığı işlər barədə tədbir iştirakçılarına məlumat verib.

Tədbirdə çıxış edən Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupunun məsul əməkdaşı Şahin İsmayılov, RPŞ-nın Qabaqçöl bölməsi üzrə rəisi Vilayət Allahverdiyev, Balakən Rayon Təhsil sektorunun müdiri Mehparə Murtuzəliyeva, “Balakən Rayon Mərkəzi Xəstəxanası” Publik Hüquqi Şəxsində Cərrahiyyə şöbəsinin həkim-narkoloqu Əsgər Axundov, Dini Qurumlarla İş üzrə Dövlət Komitəsinin Zaqatala Regional bölməsinin məsləhətçisi Ruslan Əfəndiyev, Balakən rayonu Qabaqçöl qəsəbə məscidinin imamı Ramazan Xutrayev əsrin bəlasına çevrilmiş narkomaniya, dini radikalizm və digər zərərli vərdişlərin fəsadlarından, həmin hallara qarşı aparılan mübarizə tədbirlərindən bəhs ediblər.

Sonda qonaqlar tərəfindən auditoriyanı maraqlandıran suallar cavablandırılıb, iştirakçılara maarifləndirici bukletlər paylanılıb.