“Yeni Yurd” Sosial İnkişaf İctimai Birliyinin sədri, xeyriyyəçi iş adamı Mahirə Əsədova Yeni Azərbaycan Partiyasının VIII Qurultayında Azərbaycan Prezidenti, YAP sədri İlham Əliyevin çıxışında səsləndirilən sosial-iqtisadi məsələlərlə bağlı fikirlərini bölüşüb.



Mahirə Əsədova Millixəbər.az-a açıqlamasında bildirib ki, dövlət başçısının çıxışında Azərbaycanın qarşıdakı dövr üçün iqtisadi inkişaf prioritetlərinin müəyyənləşdirilməsi, sahibkarlığın dəstəklənməsi, yeni iş yerlərinin yaradılması və regionların inkişafı ilə bağlı mühüm mesajlar səsləndirilib.
“Cənab Prezident çıxışında ölkəmizin bütün sahələr üzrə inkişaf strategiyasına toxunduğu kimi, sosial-iqtisadi məsələlərə də xüsusi diqqət ayırdı. Xüsusilə sahibkarlığın, investisiya mühitinin, nəqliyyat-logistika imkanlarının və regionların inkişafının önə çəkilməsi iş adamları üçün olduqca əhəmiyyətlidir.
Azərbaycanın Orta Dəhliz və Şimal-Cənub Dəhlizi kimi mühüm nəqliyyat marşrutlarında mövqeyinin daha da gücləndirilməsi ölkəmizin iqtisadi imkanlarını genişləndirir. Tranzit yüklərin həcminin artırılması ilə bağlı qarşıya qoyulan hədəflər yeni investisiyaların cəlb olunmasına, əlavə iş yerlərinin yaradılmasına və sahibkarlıq fəaliyyətinin genişlənməsinə mühüm imkanlar yarada bilər.
Eyni zamanda, Qarabağ və Şərqi Zəngəzurda həyata keçirilən genişmiqyaslı bərpa və quruculuq işləri Azərbaycanın sosial-iqtisadi inkişafının mühüm istiqamətlərindən biridir. Bu ərazilərdə yeni yaşayış məntəqələrinin salınması, insanların öz doğma yurdlarına qayıtması ilə yanaşı, yeni iqtisadi imkanların formalaşmasına da şərait yaradır.
Dövlət başçısının sahibkarların ölkənin iqtisadi inkişafında rolunu yüksək qiymətləndirməsi bizi, iş adamlarını daha da ruhlandırır. Biz sahibkarlar dövlət tərəfindən yaradılan imkanlardan səmərəli istifadə etməklə həm iqtisadi inkişafa, həm də yeni iş yerlərinin yaradılmasına öz töhfəmizi verməliyik.
Sahibkarlıq ölkənin sosial-iqtisadi inkişafının əsas dayaqlarından biridir. Güclü və fəal sahibkar təbəqəsinin formalaşması iqtisadiyyatın şaxələndirilməsinə, yeni investisiyaların cəlb olunmasına, istehsal və xidmət sahələrinin genişlənməsinə, ən əsası isə yeni iş yerlərinin yaradılmasına birbaşa təsir göstərir. Bu baxımdan dövlət tərəfindən sahibkarlığın inkişafı üçün yaradılan şərait və iş adamlarına göstərilən diqqət iqtisadi fəallığın artırılması baxımından mühüm əhəmiyyət daşıyır.
Biz iş adamları hesab edirik ki, sahibkarlığın inkişafı yalnız ayrı-ayrı biznes subyektlərinin deyil, bütövlükdə cəmiyyətin sosial rifahının yüksəlməsinə xidmət edir. Hər yeni müəssisə, hər yeni investisiya layihəsi yeni məşğulluq imkanları, ailələr üçün gəlir mənbəyi və ölkə iqtisadiyyatına əlavə dəyər deməkdir. Ona görə də sahibkarların dövlətin müəyyən etdiyi sosial-iqtisadi hədəflərin həyata keçirilməsində fəal iştirakı xüsusi əhəmiyyət daşıyır.
İnanırıq ki, Prezident İlham Əliyevin rəhbərliyi ilə qarşıya qoyulan sosial-iqtisadi hədəflər növbəti mərhələdə də ardıcıl şəkildə həyata keçiriləcək. Bu prosesdə dövlətlə sahibkarlar arasında əməkdaşlığın daha da güclənməsi, özəl sektorun iqtisadiyyatda rolunun artırılması ölkəmizin dayanıqlı inkişafına və sosial rifahın yüksəlməsinə mühüm töhfə verəcək.
Xüsusilə vurğulamaq istəyirəm ki, Azərbaycanın gələcək sosial-iqtisadi inkişafında sahibkarlığın rolu daha da artacaq. Dövlətin yaratdığı əlverişli biznes və investisiya mühiti, həyata keçirilən infrastruktur layihələri və yeni iqtisadi imkanlar sahibkarların fəaliyyətini genişləndirməsinə şərait yaradır. Bizim üzərimizə düşən vəzifə isə bu imkanlardan düzgün və səmərəli istifadə etmək, yeni layihələr həyata keçirmək, yeni iş yerləri yaratmaq və ölkəmizin iqtisadi gücünün artmasına öz töhfəmizi verməkdir.
Yeni Azərbaycan Partiyasının VIII Qurultayında müəyyənləşdirilən strateji istiqamətlərin ölkəmizin gələcək inkişafında mühüm rol oynayacağına inanırıq. Biz iş adamları və vətəndaş cəmiyyəti nümayəndələri olaraq dövlətimizin sosial-iqtisadi inkişaf siyasətini dəstəkləyir, sahibkarlığın inkişafı, məşğulluğun artırılması və sosial rifahın yüksəldilməsi istiqamətində üzərimizə düşən məsuliyyəti dərk edir və bu prosesə öz əməli fəaliyyətimizlə töhfə verməyə hazırıq, – deyə Mahirə Əsədova bildirib.