Bu gün Azərbaycan Respublikasında Silahlı Qüvvələr Günü qeyd olunur. Prezident, Müzəffər Ali Baş Komandan İlham Əliyevin rəhbərliyi ilə son illərdə həyata keçirilən ardıcıl dövlət quruculuğu siyasəti nəticəsində Azərbaycan Ordusu regionun ən güclü hərbi qüvvələrindən birinə çevrilib. Ordumuzun peşəkarlığı, yüksək döyüş hazırlığı və müasir texniki təminatı ölkəmizin milli təhlükəsizliyinin etibarlı təminatıdır. Bu fikrləri 26 İyun Silahlı Qüvvələr Günü münasibətilə Millət vəkili Tahir Mirkişili Millixəbər.az-a münasibət bildirərək şərh edib.

2020-ci ilin 44 günlük Vətən müharibəsində Azərbaycan Ordusu döyüş meydanında tarixi Zəfər qazanaraq ölkəmizin ərazi bütövlüyünü böyük ölçüdə bərpa etdi. Bu möhtəşəm Qələbə xalqımızın sarsılmaz birliyinin, dövlətimizin siyasi iradəsinin və Silahlı Qüvvələrimizin peşəkarlığının təntənəsi kimi tarixə yazıldı.
Müharibə dövründə Ali Baş Komandan İlham Əliyevin həyata keçirdiyi uğurlu diplomatik və informasiya siyasəti Azərbaycanın haqlı mövqeyinin beynəlxalq ictimaiyyətə çatdırılmasında mühüm rol oynadı. Dövlət başçısının prinsipial mövqeyi və qətiyyətli rəhbərliyi nəticəsində ölkəmiz həm döyüş meydanında, həm də informasiya məkanında üstünlüyünü təmin etdi. Azərbaycanın gücünü ifadə edən "Dəmir Yumruq" həm hərbi qələbənin, həm də tarixi ədalətin bərpasının rəmzinə çevrildi.

Güclü iqtisadiyyat güclü ordunun əsas dayağıdır. Son illərdə iqtisadi sahədə aparılan islahatlar, müdafiə sənayesinin inkişafı və dövlət büdcəsində müdafiə xərclərinə ayrılan vəsaitin artırılması Silahlı Qüvvələrimizin daha da güclənməsinə mühüm töhfə verib. Bu gün Azərbaycanın iqtisadi potensialı ölkənin müdafiə qabiliyyətinin möhkəmləndirilməsinə və milli təhlükəsizliyin etibarlı təmin olunmasına xidmət edir.
Silahlı Qüvvələr Günü münasibətilə qəhrəman şəhidlərimizin əziz xatirəsi dərin ehtiramla anılır, qazilərimizin və hərbi qulluqçularımızın xidmətləri yüksək qiymətləndirilir. Azərbaycan xalqı Müzəffər Ordusu ilə haqlı olaraq fəxr edir və əmindir ki, Silahlı Qüvvələrimiz bundan sonra da dövlətimizin müstəqilliyinin, suverenliyinin və ərazi bütövlüyünün keşiyində qətiyyətlə dayanacaq.

Tahir Mirkişili,
Millət vəkili, Milli Məclisin İqtisadi siyasət, sənaye və sahibkarlıq komitəsinin üzvü