Müharibə, Əmək və Silahlı Qüvvələr Veteranları Təşkilatının XI plenumunda ehtiyatda olan polkovnik Cəlil Xəlilov yekdilliklə təşkilatın sədri seçilib. O, təşkilatın gələcək fəaliyyəti, həyata keçiriləcək yeniliklər haqqında AZƏRTAC-a məlumat verərək deyib: “Müharibə, Əmək və Silahlı Qüvvələr Veteranları Təşkilatının bütün sahələrdə fəaliyyətinin daha səmərəli və operativ təşkili məqsədi ilə mövcud strukturun təkmilləşdirilməsi, rayon şöbələrinin maddi-texniki bazasının, maliyyə təminatının yaxşılaşdırılması əsas məqsədimizdir. İstənilən uğurlu fəaliyyətin arxasında düzgün struktur və kadr siyasəti dayanır. Təşkilatın rayon şöbələrinin aktivliyinin artırılması, onların fəaliyyətinin stimullaşdırılması da qarşıda duran əsas vəzifələrdəndir. Təşkilatın demək olar ki, respublikamızın bürün rayonlarında şöbələri var. Onlar yerlərdə gənclər, veteranlar arasında iş aparır, vətənpərvərlik tərbiyəsinin, milli-mənəvi dəyərlərin təbliği sahəsində mütəmadi fəaliyyət göstərirlər. Lakin onların fəaliyyətinin günün tələbləri səviyyəsində qurmaq üçün maddi-texniki bazanın gücləndirilməsinə ehtiyac var. Ona görə də qarşıdakı fəaliyyətimizdə rayon şöbələri ilə təmasların daha da dərinləşdirilməsi, təşkilatın fəaliyyətinin bölgələrdə gücləndirilməsi əsas fəaliyyət istiqamətlərimizdən biri olacaq. Təşkilatın əsas və ənənəvi fəaliyyət istiqamətlərindən biri gənclər arasında vətənpərvərlik tərbiyəsinin təbliğini gücləndirmək, onların milli-mənəvi dəyərlərə sadiqlik ruhunda tərbiyəsini təmin etməkdir. İndiki vaxtda bu, ikiqat əhəmiyyət kəsb edir. Prezident, Müzəffər Ali Baş Komandan İlham Əliyev öz çıxışlarında dəfələrlə gənclərin vətənpərvərlik və mili-mənəvi dəyərlərə sadiq şəkildə yetişdirilməsinin vacibliyinə toxunaraq bunun xalqımızın, dövlətimizin bu günü və gələcəyi baxımından əhəmiyyətini qeyd edib. Dövlət başçısı xüsusi olaraq qeyd edib ki, məhz gənclərin vətənpərvərlik eşqi, Vətənə, torpağa, bayrağa olan məhəbbəti düşmənin darmadağın edilməsi, işğaldakı torpaqlarımızın azad edilməsinə səbəb oldu. Erməni faşizmi gənclərimizin Vətən sevgisi qarşısında davam gətirə bilmədi. Ona görə də biz gənclərimiz arasında vətənpərvərlik ideologiyasının güclənməsinə xüsusi diqqət yetirməliyik, bu sahədə əməli addımlar atmalıyıq. Əsas məqsədlərimizdən biri gənclərin vətənpərvərlik ruhunda tərbiyəsinin yüksəldilməsi məqsədi ilə Müdafiə Nazirliyi, Dövlət Sərhəd Xidməti, Daxili Qoşunlar, Səfərbərlik və Hərbi Xidmətə Çağırış üzrə Dövlət Xidməti, habelə Elm və Təhsil Nazirliyi, Gənclər və İdman Nazirliyi ilə birgə iş planlarının hazırlanması və həyata keçirilməsini təmin etməkdir”.
Yeni sədr xatırladıb ki, təşkilat indiyə qədər də bu sahədə çoxlu görüşlər keçirib, layihələr gerçəkləşdirib: “Biz gələcək fəaliyyətimizdə bu əməkdaşlığın miqyasını genişləndirmək, daha çox gəncin həmin layihələrdən bəhrələnməsini təmin etmək niyyətindəyik. İnanıram ki, onun öhdəsindən gələ biləcəyik. Müxtəlif kateqoriyadan olan veteranlar, Vətən müharibəsi qaziləri və şəhidlərin ailə üzvləri ilə təşkilatın mərkəzi ofisində, rayon şöbələrində, hərbi hissələrdə, universitet və orta məktəblərdə mütəmadi görüşlərin təşkili, Müdafiə Nazirliyinin Milli Müdafiə İnstitutunda, Dövlət Təhlükəsizliyi Xidməti və Dövlət Sərhəd Xidmətlərinin akademiyalarında, digər hərbi təmayüllü məktəblərdə təhsil alan gənc hərbçilərlə görüşlərin keçirilməsi diqqət mərkəzində olacaq. Şəhid ailələri və veteranlarla bağlı məsələlərin bundan sonra da diqqətdə saxlanılması, onların problemlərinin həlli ilə bağlı dövlət orqanları ilə əlaqələrin gücləndirilməsinə çalışacağıq. Veteranların sanator-kurort müalicəsi, istirahətləri və asudə vaxtlarının təşkili məsələlərinin diqqətdə saxlanılması da həyata keçirəcəyimiz layihələrdə yer alacaq. Ümumiyyətlə, hesab edirik ki, mövcud reallıqlar veteranlara, onların qayğı və tələbatlarına yeni bir baxışı zəruri edir. Təşkilatımızın Türk dövlətlərinin, MDB ölkələrinin veteran təşkilatları və beynəlxalq veteran təşkilatları ilə əlaqələrinin gücləndirilməsi üçün tədbirlərin görülməsi, o cümlədən zəruri xarici səfərlər üçün maliyyə imkanlarının yaradılması da başlıca məqsədlərdən birinə çevriləcək. Təşkilatın fəaliyyətini, gördüyü işləri operativ işıqlandırmaq, televiziya verilişi yaratmaq, elektron media resursumuzun maddi-texniki bazasının gücləndirilməsi və fəaliyyətinin daha da optimallaşdırılması da bizi düşündürən əsas məsələlərdən biridir. Ümid edirəm ki, dövlətimizin göstərdiyi qayğı və təşkilat üzvlərinin çalışqanlığı, işgüzarlığı sayəsində bir sıra uğurlu işləri həyata keçirmək mümkün olacaq və təşkilatımızın tarixində yeni bir mərhələ başlayacaq”.
