Balakən Rayon İcra Hakimiyyətində qəbul imtahanlarında 600-dən yuxarı bal toplayaraq tələbə adını qazanan məzunlarla görüş keçirilib.

Millixəbər.az-ın məlumatına görə, görüşdə Balakən Rayon İcra Hakimiyyətinin başçısı İslam Rzayev tələbə adını qazanan məzunları təbrik edib, onlara savadlı, bilikli, bacarıqlı gənc kadr kimi müstəqil Azərbaycanın inkişafı, tərəqqisi naminə görülən işlərdə layiqli töhfələr vermələrini arzulayıb. Rayon rəhbəri qeyd edib ki, ölkəmizdə əsası ümummilli liderimiz Heydər Əliyev tərəfindən qoyulmuş və bu gün Prezident İlham Əliyev tərəfindən uğurla davam etdirilən milli təhsil quruculuğu və islahatları öz töhfəsini verməkdədir. Ulu Öndərin müdrik uzaqgörənliyi, həm də dövlət başçısı İlham Əliyevin bu xətti ardıcıl şəkildə davam etdirməsi göstərir ki, təhsil Azərbaycanın gələcəyini müəyyənləşdirən ən mühüm amildir. Tələbəlik illəri gənclərdən daha çox məsuliyyət, daha çox zəhmət, daha geniş dünyagörüşü tələb edir. Təhsili uğurla başa vurmaq, seçdiyi ixtisası dərindən öyrənmək, kamil mütəxəssis kimi yetişmək tələbələrin qarşısında duran əsas vəzifələrdir. Əldə olunan biliklər yalnız gənclərin gələcəyi üçün deyil, həm də Azərbaycanın gələcəyi üçündür.

Digər çıxış edənlər məzunları yüksək nəticələrlə tələbə adına layiq görülmələri münasibətilə təbrik edib və nailiyyətlərinin davamlı olmasını arzulayıblar.
Sonda qəbul imtahanlarında yüksək bal toplayan tələbələrə qiymətli xatirə hədiyyələri təqdim edilib. Ali məktəblərə keçirilən qəbul imtahanlarında 695 bal toplayaraq rayon birincisi olan Amin Novruzov adına humanitar və texniki fənlər təmayüllü liseyin məzunu Məmmədov Şahin İmran oğlu Balakən Rayon İcra Hakimiyyətinin Fəxri Fərmanı ilə təltif edilib.

Qeyd edək ki, bu il rayonun 295 məzunu tələbə adına layiq görülüb, onlardan 10 nəfəri 600-dən, 47 nəfəri isə 500-dən yuxarı nəticə göstərib.