Abşeron Rayon İcra Hakimiyyətinin və Azərbaycan Televiziyasının Analitik Qrupunun birgə təşkilatçılığı ilə rayonun fəal ictimaiyyət nümayəndələri ilə görüş keçirilib.

Xırdalan şəhərindəki Heydər Əliyev Mərkəzində baş tutan tədbirdə Dövlət Himni oxunub, Ümummilli Lider Heydər Əliyevin və vətənimizin bütövlüyü uğrunda şəhidlik zivəsinə ucalan qəhrəmanlarımızın əziz xatirəsi bir dəqiqəlik sükutla yad edilib.
Tədbirdə Abşeron RİH başçısının müavini Gülnar Rəhimova çıxış edərək görüşün Azərbaycan Televiziyasının yaranmasının 70 illiyi ərəfəsində keçirildiyini qeyd edərək qonaqları yubileyləri münasibəti ilə təbrik edib.
Azərbaycan Televiziyasında daima ictimaiyyət üçün vacib hadisələr, təcili məlumatlar və dövlət səviyyəli açıqlamalar operativ və düzgün şəkildə cəmiyyətə çatdırıldığını vurğulayan G.Rəhimova əlavə edib ki, AzTV-nin Analitik Qrupunun respublikamızın bölgələrində ictimaiyyət nümayəndələri ilə görüşdüyünü və onların təklif və arzularını öyrəndiyini, səslənən fikirlərin emal edilərək efirə gedən veriliş və proqramlarda əks olunacaq.
Analitik Qrupunun rəhbəri, əməkdar jurnalist Faiq Hüsiyev bildirib ki, görüşlərdə yeni inkişaf mərhələsinə qədəm qoyan Azərbaycan Televiziyasında yayımlanan layihələr müzakirə olunur, ictimaiyyət nümayəndələrinin fikir və təklifləri dinlənilir. O, səsləndirilən təkliflər əsasında “Azərbaycan Televiziya və Radio Verilişləri” QSC-nin tərkibində fəaliyyət göstərən İdman TV və Mədəniyyət TV-də də yeni proqramların hazırlanmasının nəzərdə tutulduğunu bildirib.
Daha sonra Analitik Qrupun digər üzvləri diktor, Əməkdar artist Sevda Ağazadə, İdman telekanalının şöbə rəisi, Əməkdar jurnalist Fikrət Adıgözəlli, Analitik Proqramlaşma şöbəsinin rəisi Ceyhun Dünyamalıyev, “Səhər” redaksiyasının baş redaktoru Sitarə Həmidova, “Tele Səhər” proqramının baş redaktoru Nəcibə Əlixanova və Buraxılış və əlaqələndirmə şöbənin rəisi Elməddin Quliyev çıxış edərək Milli-mənəvi dəyərlərin, adət-ənənələrimizin Azərbaycan Televiziyada nümayiş olunduğunu qeyd ediblər və efirə gedən verilişlər və proqramlar haqqında ətraflı məlumat veriblər.
Aparılan müzakirələr zamanı Abşeron RİH yanında İctimai Şuranın sədri, şəhid Elçin Həsənlinin anası Xatirə İsmayılova, Abşeron Ağsaqqallar Şurasının sədri, şəhid Rauf İbadovun atası Məhərrəm İbadov, Müasir İnternet Resursları İnkişafı İctimai birliyinin sədri Zamin Zeynalov, Xırdalan şəhər 11 illik Musiqi Məktəbinin direktoru İkram Manafov, 48 saylı Dairə Seçki Komissiyasının sədri Dilşad Abbasova, rayon gənclər və idman sektorunun müdiri Xannənə Ağayeva, Qərbi Azərbaycan İcmasının Abşeron rayon Nümayəndəliyinin Gənclərlə İş üzrə məsul şəxsi Heydər Vəliyev və digərləri çıxış edərək bildiriblər ki,
Azərbaycan Televiziyası hər bir vətəndaşımız üçün doğmadır. Qeyd edilib ki, bu kanalın efirində tariximiz, xalqımızın milli-mənəvi dəyərləri daima yaşadılıb. Azərbaycan Televiziyası respublikamızın güzgüsü, nümunəsidir. Hər zaman olduğu kimi bu gün də xalqımızın, şəhid ailələrinin yanındadır. Respublikamızın həyatında baş verən bütün ictimai-siyasi proseslərlə bağlı ətraflı və dolğun məlumatları yaymaqdadır. Dövlət Televiziyası hər zaman ölkəmizin informasiya məkanı üçün örnək nümunəsi sərgiləyən TV kanal olubdur. Qeyd edilib ki, respublikamızda fəaliyyət göstərən musiqi məktəblərinin konsertlərinin təşkil olunması arzuolunandır. Çünki bu kimi verilişlər uşaqlara çox böyük stimul verir.
Müzakirələrdə çıxış edən digər çıxışçılar da Azərbaycan Televiziyasının dilimizin saflığına verdiyi töhfələr, “Böyük qayıdış”, həmçinin “Qərbi Azərbaycana qayıdış” konsepsiyasını diqqət mərkəzində saxladılar, təklif və və arzularını bildirdilər.