8 Noyabr – Zəfər Günü Azərbaycanın dövlətçilik tarixində xalqımızın qürur mənbəyi, milli iradənin və yenilməz gücün təntənəsidir.

Millixəbər.az-ın məlumatına görə,şanlı qələbəmizin 5-ci ildönümü ilə əlaqədar Balakən rayonunda silsilə tədbirlər həyata keçirilir. Bu ali ideyanı davam etdirərək 8 Noyabr – Zəfər Günü münasibətilə Yevlax-Zaqatala-Gürcüstan dövlət sərhədi avtomobil yolunun Balakən rayonunun Katex, Qasbinə, Qullar, Poştbinə yaşayış məntəqələrindən keçən hissələrində ağacəkmə aksiyası keçirilib.

Aksiyada Balakən Rayon İcra Hakimiyyəti başçısının vəzifəsini müvəqqəti icra edən Turan Dibirov, RİH başçısı Aparatının məsul əməkdaşları, rayon hüquq-mühafizə orqanlarının, idarə, müəssisə, təşkilatların rəhbərləri, Şəhid ailələri, qazi və veteranlar, rayon ictimaiyyətinin nümayəndələri iştirak ediblər.

Ümumilikdə rayon üzrə ağacəkmə aksiyasında yol kənarlarına, çoxmənzilli binanın həyətinə 1320 ədəd ağac (120 ədəd həmişəyaşıl şam, 200 ədəd şabalıd və 1000 ədəd feyxoa) əkilib. Əkilən ağaclar suvarılıb və yaşıllıqlara aqrotexniki qaydada qulluq göstərilib.

Aksiyanın məqsədi həm ekoloji mühitin yaxşılaşdırılması, həm də Zəfər Gününün mənəvi dəyərinin cəmiyyətə çatdırılmasıdır. Kök salan hər bir fidan, Azərbaycanın qazandığı tarixi zəfərin əbədiliyini simvolizə edir və bu qələbənin nəsildən-nəsilə ötürüləcək dəyər olduğunu ifadə edir.


Şanlı qələbəmizin izləri yaşıl sabahın hər budağında yaşayacaqdır.