Azərbaycan Respublikasının Prezidenti cənab İlham Əliyevin Naxçıvan Muxtar Respublikasına səfəri bu qədim diyarın hərtərəfli inkişafı, strateji əhəmiyyətinin daha da gücləndirilməsi və Azərbaycanın regional nəqliyyat-kommunikasiya imkanlarının genişləndirilməsi istiqamətində həyata keçirilən məqsədyönlü və ardıcıl dövlət siyasətinin növbəti mühüm təzahürüdür. Bu fikirləri Milli Məclisin deputatı Soltan Məmmədov deyib.
Deputat bildirib ki, Naxçıvanın sosial-iqtisadi inkişafı Azərbaycanın regional geosiyasi və geoiqtisadi mövqelərinin daha da möhkəmləndirilməsi baxımından xüsusi əhəmiyyət daşıyır:

“Bu gün Naxçıvanın qarşısında tamamilə yeni inkişaf mərhələsi açılır. Müasir infrastrukturun formalaşdırılması, nəqliyyat və logistika imkanlarının genişləndirilməsi, şəhərsalma və sosial layihələrin həyata keçirilməsi Naxçıvanın regionda daha mühüm iqtisadi və nəqliyyat mərkəzlərindən birinə çevrilməsi üçün möhkəm zəmin yaradır. Naxçıvan şəhərinin uzunmüddətli inkişafını nəzərdə tutan Baş Planın hazırlanması da dövlət siyasətinin yalnız cari məsələlərə deyil, onillikləri əhatə edən strateji hədəflərə əsaslandığını göstərir.”
S. Məmmədov bildirib ki cənab Prezident İlham Əliyevin səfər zamanı müəyyən etdiyi strateji prioritetlər Naxçıvanın Azərbaycanın ümumi inkişaf strategiyasında xüsusi və mühüm yer tutduğunu bir daha nümayiş etdirdi: “Xüsusilə nəqliyyat-kommunikasiya layihələrinin inkişafı Naxçıvanın ölkəmizin əsas iqtisadi məkanına daha sıx inteqrasiyasına, regionlararası əlaqələrin genişlənməsinə və Azərbaycanın Şərq-Qərb, Şimal-Cənub nəqliyyat dəhlizlərində rolunun daha da güclənməsinə mühüm töhfə verəcək. Bu baxımdan Zəngəzur dəhlizinin açılması Azərbaycanın regional nəqliyyat xəritəsində mövqeyini əhəmiyyətli dərəcədə gücləndirəcək strateji layihələrdən biridir. Naxçıvanın Azərbaycanın əsas hissəsi ilə dayanıqlı və fasiləsiz nəqliyyat əlaqəsinin təmin olunması təkcə ölkəmiz üçün deyil, bütövlükdə region dövlətləri və beynəlxalq nəqliyyat marşrutları baxımından mühüm iqtisadi imkanlar yaradacaq. Bu layihə regionda sülhün, sabitliyin və əməkdaşlığın möhkəmləndirilməsinə xidmət edən yeni bağlantıların formalaşmasına da şərait yaradacaq.”
Millət vəkili vurğulayıb ki, cənab Prezident İlham Əliyevin rəhbərliyi ilə həyata keçirilən məqsədyönlü siyasət Naxçıvanın sosial-iqtisadi inkişafı, təhlükəsizliyi və strateji imkanlarının genişləndirilməsi üçün möhkəm əsaslar yaradıb:
“Əminliklə demək olar ki, cənab Prezident İlham Əliyevin bu səfəri Naxçıvanın yeni inkişaf mərhələsinə keçidini daha da sürətləndirəcək, muxtar respublikanın iqtisadi potensialının tam reallaşdırılmasına və əhalinin rifahının daha da yüksəldilməsinə mühüm töhfə verəcək. Naxçıvanın inkişafı eyni zamanda Azərbaycanın bütövlükdə regional liderlik mövqeyinin, nəqliyyat-logistika imkanlarının və geoiqtisadi əhəmiyyətinin daha da möhkəmlənməsinə xidmət edəcək”.