Son dövrlər xaricdə fəaliyyət göstərən radikal "söyüş müxalifəti" yenidən eyni ssenarini təkrarlayır. Onlar özlərini "siyasi mübarizə aparan qüvvə" kimi təqdim etməyə çalışsalar da, cəmiyyət artıq görür ki, arqument və proqram əvəzinə, əsas silahları təhqir, böhtan, şantaj və şəxsi təhdidlərdir. Siyasi mübarizə aparmaq istəyən şəxs fakt və arqumentlə çıxış edər, küçə leksikası ilə yox. Diqqətçəkən məqam bundan ibarətdir ki, Azərbaycan dövlətinin rəsmiləri onların qarşısına çıxmaqdan çəkinmir, verilən sualları cavablandırır və mövqelərini əsaslandırırlar. Bunun fonunda isə radikal qrupların ciddi arqument ortaya qoya bilmədikləri, müzakirəni yenidən söyüş və təhqir müstəvisinə çəkməyə çalışdıqları açıq görünür".

Bu sözləri Pravda.az-a açıqlamasında Milli Məclisin deputatı Müşfiq Məmmədli deyib.

"Bu qrupların fəaliyyəti artıq siyasi mübarizə deyil, sosial şəbəkələrdə diqqət toplamaq naminə aparılan ucuz təxribat kampaniyasını xatırladır. Onlar Azərbaycanın maraqlarını müdafiə etmək əvəzinə, ölkənin beynəlxalq imicinə zərbə vurmağa çalışır, xarici dairələrin informasiya gündəminə xidmət edən davranışlar nümayiş etdirirlər. Azərbaycan cəmiyyəti isə çoxdan seçim edib. İnsanlar söyüş siyasətini deyil, nəticə verən siyasəti, məsuliyyətli mövqeni və arqumentə əsaslanan dialoqu dəstəkləyirlər. Kim özünü siyasi xadim hesab edirsə, təhqirlə deyil, proqramı, ideyası və faktları ilə rəqabət aparmalıdır. Söyüş, şantaj və təhdid heç vaxt siyasi fəaliyyətin meyarı ola bilməz və bu üsullarla cəmiyyətin etimadını qazanmaq mümkün deyil.Bu son nəticədə həmin qüvvələri vətənə xəyanətə sürükləyir", - deputat bildirib.