Milli Məclisin deputatı Tahir Mirkişili Sumqayıtda fəaliyyət göstərən Peşə Təhsil Mərkəzlərinin məzunları ilə görüş keçirib.

Millixəbər.az xəbər verir ki, görüşdə çıxış edən deputat müasir iqtisadiyyatın sürətlə dəyişdiyini, yeni texnologiyaların tətbiq olunduğunu, yeni müəssisələrin və istehsal sahələrinin yaradıldığını bildirib. O qeyd edib ki, baş verən dəyişikliklər əmək bazarında həm nəzəri biliklərə, həm də praktik bacarıqlara malik peşəkar kadrlara tələbatı daha da artırır.
Tahir Mirkişili vurğulayıb ki, Peşə Təhsil Mərkəzlərinin məzunları ölkənin inkişafında mühüm rol oynayacaq gənclər sırasındadır. Deputat məzunlara gələcək fəaliyyətlərində uğurlar arzulayaraq onlara öyrənməyi heç vaxt dayandırmamağı, dəyişikliklərə açıq olmağı, işlərini sevərək və vicdanla yerinə yetirməyi, eləcə də seçdikləri peşə ilə fəxr etməyi tövsiyə edib.
Görüşdə qeyd olunub ki, Sumqayıtda fəaliyyət göstərən Peşə Təhsil Mərkəzlərinin məzunları gələcəkdə Azərbaycanın sənaye, xidmət, texnologiya və innovasiya sahələrində uğurla fəaliyyət göstərərək ölkənin iqtisadi inkişafına mühüm töhfələr verəcəklər.
Tədbir qarşılıqlı fikir mübadiləsi şəraitində davam edib. Məzunları maraqlandıran suallar cavablandırılıb, onların gələcək karyera imkanları ilə bağlı müzakirələr aparılıb.