Bakıda, Heydər Əliyev Mərkəzində Yeni Azərbaycan Partiyasının VIII Qurultayı keçirilib. Azərbaycan Respublikasının Prezidenti, Yeni Azərbaycan Partiyasının Sədri İlham Əliyev qurultayda geniş nitq söyləyərək partiyanın 30 ildən artıq müddətdə keçdiyi siyasi yolu, Azərbaycanın əldə etdiyi tarixi nailiyyətləri, ölkənin qarşısında dayanan yeni vəzifələri və qarşıdakı dövrün əsas prioritetlərini diqqətə çatdırıb.

Qurultay Azərbaycanın ictimai-siyasi həyatında mühüm hadisə olmaqla yanaşı, Yeni Azərbaycan Partiyasının yeni mərhələdə fəaliyyət istiqamətlərinin və qarşıya qoyulan vəzifələrin müəyyənləşdirilməsi baxımından da xüsusi əhəmiyyət daşıyır.
Qurultay çərçivəsində YAP-ın İdarə Heyətinin yeni tərkibi müəyyənləşdirilib. Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişili yenidən Yeni Azərbaycan Partiyasının İdarə Heyətinin üzvü seçilib. YAP-ın rəsmi məlumatında Tahir Mirkişilinin İdarə Heyətinin tərkibində yer aldığı qeyd olunur.
Tahir Mirkişili ona göstərilən etimadla bağlı bildirib ki, Yeni Azərbaycan Partiyasının İdarə Heyətində fəaliyyətinin davam etdirilməsini böyük məsuliyyət kimi qəbul edir.
“Yenidən YAP İdarə Heyətinin üzvü seçildim. Göstərilən yüksək etimada görə Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə dərin minnətdarlığımı bildirirəm”, – deyə Tahir Mirkişili qeyd edib.
Deputat vurğulayıb ki, Yeni Azərbaycan Partiyasının siyasi fəaliyyəti Azərbaycan dövlətçiliyinin inkişafı və ölkənin qarşısında duran strateji hədəflərin həyata keçirilməsi ilə sıx bağlıdır. Onun sözlərinə görə, partiyanın keçdiyi tarixi yol və formalaşdırdığı siyasi ənənələr yeni dövrün çağırışlarına uyğun fəaliyyət üçün mühüm əsas təşkil edir.
“Yeni Azərbaycan Partiyası daim Heydər Əliyev yolu ilə gedərək, qarşısına qoyduğu hədəflərə çataraq ölkəmizin inkişafına xidmət etməkdədir”, – deyə Tahir Mirkişili bildirib.
Qeyd edək ki, YAP VIII Qurultayına hazırlıq çərçivəsində sentyabrın 7-dən 19-dək partiyanın 84 yerli təşkilatında hesabat konfransları keçirilib. Bu tədbirlərdə 16 mindən çox partiya üzvü iştirak edib və qurultayda iştirak etmək üçün 960 nümayəndə seçilib. Qurultay nümayəndələri tədbirdən əvvəl Ümummilli Lider Heydər Əliyevin məzarını ziyarət edərək onun xatirəsini yad ediblər.
VIII Qurultay Yeni Azərbaycan Partiyasının qarşıdakı fəaliyyət dövrünün əsas istiqamətlərinin müəyyənləşdirilməsi, siyasi təşkilatlanmanın daha da təkmilləşdirilməsi və yeni ictimai-siyasi reallıqlara uyğun vəzifələrin qarşıya qoyulması baxımından mühüm mərhələ kimi yadda qalır.

Millixeber.az