Milli Məclisin Asiya Parlament Assambleyasındakı nümayəndə heyətinin rəhbəri Rizvan Nəbiyev Bəhreyn Krallığının Manama şəhərində keçirilən APA təşkilatın Plenar Sessiyasında çıxış edib. Plenar sessiya “Asiya parlamentlərinin Asiyada mədəniyyətlərarası və sivilizasiyalararası dialoqun gücləndirilməsində rolu: imkanlar, çağırışlar və gələcək inkişaf"
mövzusuna həsr olunub.

Millixəbər.az xəbər verir ki, R. Nəbiyev çıxışında Asiyada sülhün və tərəqqinin möhkəmləndirilməsində parlamentlərin mədəniyyətlərarası və sivilizasiyalararası dialoqun inkişafında mühüm rol oynadığını vurğulayıb.
Deputat çıxışında Azərbaycanın multikulturalizm sahəsində zəngin tarixi təcrübəsi barədə məlumat verib. Azərbaycanın coğrafi mövqeyi və tarixi irsi onu təbii şəkildə sivilizasiyalararası dialoqun mərkəzinə çevirib. O vurğulayıb ki, bu ənənələr Azərbaycanın həm Avropa, həm də Asiya institutları ilə fəal əməkdaşlığı ilə daha da möhkəmlənib.
Rizvan Nəbiyev 2008-ci ildə Azərbaycanın təşəbbüsü ilə başlanmış Bakı Prosesi haqqında danışaraq bu təşəbbüsün mədəniyyətlərarası dialoqun təşviqi istiqamətində mühüm beynəlxalq platformaya çevrildiyini bildirib. O qeyd edib ki, Bakı Prosesi çərçivəsində qəbul edilmiş “Mədəniyyətlərarası dialoqun təşviqi üzrə Bakı Bəyannaməsi” və sonrakı illərdə keçirilən Ümumdünya Mədəniyyətlərarası Dialoq Forumları, Dünya Dini Liderlərinin Forumu, Bakı Humanitar Forumu və Bakı Qlobal Forumu mədəniyyətlər və sivilizasiyalar arasında qarşılıqlı etimadın möhkəmləndirilməsinə töhfə verir.
Rizvan Nəbiyev Azərbaycanda multikulturalizmin dövlət siyasətinin ayrılmaz hissəsi olduğunu bildirərək, 2016-cı ilin Multikulturalizm İli, 2017-ci ilin isə İslam Həmrəyliyi İli elan edilməsinin bu siyasətin bariz nümunəsi olduğunu diqqətə çatdırıb. Deputat vurğulamışdır ki,
2025-ci ildə Prezident İlham Əliyev Bakıda keçirilən “İslamofobiya: Qərəzlərin ifşası və damğaların aradan qaldırılması” adlı beynəlxalq konfransa müraciət ünvanlamışdır.Onun müraciəti BMT Baş Assambleyasının və Təhlükəsizlik Şurasının rəsmi sənədi kimi yayılmışdır. Bu, Azərbaycanın islamofobiya ilə mübarizə və tolerantlığın təşviqi istiqamətində çağırışına beynəlxalq dəstəyin ifadəsidir.