Azərbaycanın Pakistandakı səfirliyinin dəstəyi, bu ölkənin aparıcı beyin mərkəzlərindən olan Müslüm İnstitutunun təşkilatçılığı ilə Pakistan Milli Kitabxanasında “Azərbaycan-Pakistan qardaşlığı: Hüzn və Qara Yanvar şəhidlərinin anım günü” mövzusunda dəyirmi masa təşkil olunub.

Millixəbər.az xəbər verir ki, səfirlikdən AZƏRTAC-a bildiriblər ki, diplomatların, beyin mərkəzlərinin və universitetlərin rəhbər şəxslərinin, alimlərin, ictimaiyyət və media nümayəndələrinin iştirak etdikləri tədbirdə əvvəlcə 20 Yanvar şəhidlərinin əziz xatirəsi bir dəqiqəlik sükutla yad edilib. Sonra 20 Yanvar hadisələrinə həsr olunmuş videoçarx nümayiş etdirilib.

Səfir Xəzər Fərhadov bildirib ki, Azərbaycan xalqının milli azadlıq hərəkatının yatırılması məqsədilə keçmiş SSRİ tərəfindən 36 il əvvəl dinc əhaliyə qarşı törədilən qanlı qətliamın ildönümü hər il ölkəmizdə 20 Yanvar – Ümumxalq Hüzn Günü kimi qeyd olunur. Müasir tariximizin dərin kədər, eyni zamanda, böyük qürur tarixi olan 20 Yanvar hadisələrinin tarixindən danışan diplomat diqqətə çatdırıb ki, Azərbaycanın müstəqillik və ərazi bütövlüyü uğrunda mübarizə aparan xalq hərəkatını boğmaq məqsədilə 1990-cı ilin yanvarın 19-dan 20-sinə keçən gecə sovet ordusunun bölmələri, xüsusi təyinatlılar, habelə daxili qoşunların kontingenti tərəfindən Bakı, Sumqayıt, Lənkəran və Neftçalada mülki əhaliyə qarşı amansız qətliam törədilib. Nəticədə 150 mülki şəxs qətlə yetirilib, 744 nəfər ağır yaralanıb, 4 nəfər itkin düşüb.

X.Fərhadov dövrün mürəkkəbliyinə, keçmiş sovet hakimiyyətinin 20 yanvar həqiqətlərinin yayılmasının qarşısını almaq istiqamətində gördüyü tədbirlərə baxmayaraq, Ulu Öndər Heydər Əliyevin amansız qətliamın beynəlxalq ictimaiyyətin diqqətinə çatdırdığını söyləyib. Xalqımıza qarşı törədilən bir sıra cinayətlər, o cümlədən 20 Yanvar faciəsinə siyasi-hüquqi qiymətin verilməsi də Ümummilli Liderin hakimiyyətə qayıtmasından sonra təmin edilib.

Səfir X.Fərhadov Müzəffər Ali Baş Komandan, Prezident İlham Əliyevin rəhbərliyi altında Silahlı Qüvvələrimizin 2020-ci ilin 44 günlük Vətən müharibəsində və 2023-cü ilin 19-20 sentyabr antiterror tədbirləri nəticəsində işğala son qoymasından, ərazi bütövlüyümüzün və suverenliyimizin təmin edilməsindən də söz açıb.

İki qardaş ölkə arasındakı mövcud əlaqələrdən bəhs edən səfir, həmçinin qeyd edib ki, Pakistanın bütün dövrlərdə Azərbaycanın beynəlxalq hüququn norma və prinsiplərinə əsaslanan mövqeyinə nümayiş etdirdiyi prinsipial mövqe, ölkəmizə göstərilən birmənalı siyasi və mənəvi dəstək qardaşlıq münasibətlərimizin əsl təzahürüdür.

Digər məruzəçilər 20 Yanvar hadisələrinin Azərbaycan tarixində xüsusi əhəmiyyət kəsb etdiyini, qadın və uşaqlar da daxil olmaqla günahsız insanların qətlə yetirildiyi qətliamın Azərbaycan xalqının iradəsini qıra bilmədiyini, əksinə, müstəqillik yolunda şanlı tarixin yazılmasına səbəb olduğunu bildiriblər.