20 Yanvar faciəsinin 36-cı ildönümü Abşeron rayonunda dərin hüzn və sonsuz ehtiramla yad edilib. Qəlblərdə sızıltı, baxışlarda qürurla keçirilən anım tədbiri Azərbaycan xalqının azadlıq eşqinin, mübarizə ruhunun təcəssümüdür.

Tədbir iştirakçıları 1990-cı ilin soyuq, şaxtalı 20 yanvar gecəsində Vətən uğrunda canından keçən şəhidlərin ruhu qarşısında baş əyib, onların müqəddəs xatirəsini bir dəqiqəlik sükutla anıblar. O qanlı gecə təkcə günahsız insanların qətli deyil, həm də xalqın sarsılmaz iradəsinin, azadlığa aparan yolunun başlanğıcı kimi xatırlanıb.
Çıxışlarda vurğulanıb ki, 20 Yanvar Azərbaycan tarixində kədər və qürurun qovuşduğu bir gündür. Bu faciə xalqımızı qorxutmadı, əksinə, onu daha da birləşdirdi, müstəqillik amalını alova çevirdi. Birsözlə, Abşeronda keçirilən anım tədbiri bu ali dəyərlərə vətəndaş diqqəti və sədaqətinin ifadəsidir.
Anım mərasimi gənc nəsillərə qanla yazılan bu tarixin unudulmaması, şəhidlərin müqəddəs xatirəsinin daim uca tutulması mesajı ilə başa çatıb.

Qeyd edək ki, Millixəbər.az informasiya portalının rəhbəri, Müasir İnternet Resuslarının İnkişafı İctimai Birliyinin sədri Zamin Zeynal Abşeron rayonunda 20 Yanvar faciəsinin 36-cı ildönümü ilə bağlı keçirilən anım tədbirində iştirak edib.