Milli Məclisin deputatı Tahir Mirkişili Ağalı kəndində Yeni Azərbaycan Partiyasının Laçın və Zəngilan rayon təşkilatlarının birgə təşkilatçılığı ilə keçirilən “Milli Qurtuluşdan Böyük Qayıdışa: Azad edilmiş ərazilərdə quruculuq və dayanıqlı inkişaf modeli” mövzusunda keçirilən tədbirdə iştirak edərək çıxış edib.

Millixəbər.az xəbər verir ki, tədbirdə Milli Qurtuluşun Azərbaycan dövlətçiliyinin möhkəmlənməsindəki tarixi rolu, işğaldan azad edilmiş ərazilərdə aparılan bərpa-quruculuq işləri və Böyük Qayıdış proqramının uğurlu icrası barədə fikir mübadiləsi aparılıb.
Bildirilib ki, azad edilmiş ərazilərdə həyata keçirilən genişmiqyaslı layihələr regionların sosial-iqtisadi inkişafına, müasir yaşayış məntəqələrinin yaradılmasına və əhalinin doğma torpaqlarına qayıdışının təmin olunmasına xidmət edir.
Tədbir çərçivəsində iştirakçılar Zəngilan rayonunda həyata keçirilən bərpa və quruculuq işləri ilə yaxından tanış olublar. Onlara bölgədə icra olunan infrastruktur layihələri, yaşayış məhəllələrinin tikintisi, yol-nəqliyyat və kommunal sistemlərin yenidən qurulması istiqamətində görülən işlər barədə məlumat verilib.
Səfər zamanı deputat Tahir Mirkişili və tədbir iştirakçıları şəhid ailələri və qaziləri də ziyarət ediblər. Görüşlərdə onların sosial rifahı və qayğıları ilə maraqlanılıb, şəhidlərin əziz xatirəsi ehtiramla yad olunub, qazilərin göstərdiyi qəhrəmanlığın dövlət tərəfindən yüksək qiymətləndirildiyi vurğulanıb.
Qeyd olunub ki, bu cür tədbirlər Milli Qurtuluş ideyalarının təbliği, Böyük Qayıdış prosesinin əhəmiyyətinin ictimaiyyətə çatdırılması və azad edilmiş ərazilərdə formalaşdırılan dayanıqlı inkişaf modelinin təşviqi baxımından mühüm əhəmiyyət daşıyır.