Azərbaycanda həkimlərin ümumi sayı 2026-cı ilin əvvəlinə 34 776 nəfər təşkil edib. Bu, 2025-ci ilin əvvəli ilə müqayisədə 1/3% azdır. Həmin dövrdə ölkədə 35 233 həkim fəaliyyət göstərib.

Dövlət Statistika Komitəsinin məlumatına görə, ən kəskin azalma psixiatr və pediatrların sayında qeydə alınıb. Belə ki, psixiatrların sayı 12% azalaraq 400-dən 352-yə, pediatrların sayı isə 10/8% azalaraq 3 670-dən 3 274-ə düşüb.

Terapevtlərin sayı 6/9% azalaraq 8 910-dan 8 294-ə, cərrahların sayı 4/8% azalaraq 3 722-dən 3 543-ə enib. Nevropatoloqların sayı 3.5% azalaraq 1 002-dən 967-yə, ginekoloqların sayı isə 2.4% azalaraq 1 968-dən 1 920-yə düşüb.

Müqayisə olunan ixtisaslar arasında yalnız oftalmoloqların sayında artım qeydə alınıb. Onların sayı bir il ərzində 3.4% artaraq 968-dən 1 001-ə çatıb.

Bəs bəzi sahələr üzrə həkimlərin sayı niyə azalır?

Məsələ ilə bağlı Oxu.Az-a danışan Milli Məclisin Səhiyyə Komitəsinin üzvü Pərvanə Vəliyeva bildirib ki, statistikaya əsasən, Azərbaycanda həkimlərin sayı 1991-2021-ci illər arasında 14% azalıb.



Azərbaycanda həkimlərin sayı azalıb: Ən çox bu mütəxəssislər çatışmır - FOTO

Onun sözlərinə görə, 2021-2025-ci illərdə isə bu göstərici 8.8% artıb:

"Əhalinin hər 10 000 nəfərinə düşən həkimlərin sayı 2021-ci ildə 31.7-dən 2025-ci ildə 34.5-ə yüksəlib. İqtisadi Əməkdaşlıq və İnkişaf Təşkilatının (OECD) orta göstəricisi hər 10 000 nəfərə 39 həkimdir. Azərbaycanın göstəriciləri təxminən ideal hesab olunan bu göstərici ilə üst-üstə düşür.

Lakin bəzi ixtisaslar üzrə çatışmazlıq aydın hiss olunur. Son 5 ildə terapevt, cərrah, ginekoloq və pediatrların sayı artıb. Əksinə, narkoloq, psixiatr və vərəm üzrə mütəxəssislərin çatışmazlığı aydın hiss olunur.

Azalmanın təbii səbəbləri bu ixtisaslar üzrə həkimlərin işlədiyi çətin kontingent, risklər, iş yükü və maaş kimi amillərdir.

Bu sahələrdə çalışmaq gənc tibb kadrlarına cəlbedici görünmür. Həkimlərin sayının azalması qlobal tendensiyadır. Həkim peşəsinin sosial nüfuzunun yüksək olmasına baxmayaraq, bu peşənin uzun hazırlıq müddəti, yüksək məsuliyyəti, iş yükü və dəyişən iş-həyat balansı gözləntiləri onun bəzi gənclər üçün əvvəlki qədər cəlbedici olmamasına gətirib çıxarıb.

Bu tendensiya Avropada da aydın hiss olunur. Avropa Komissiyasının səhiyyə işçi qüvvəsinə dair materiallarında həkimlərin iş şəraiti, kadr çatışmazlığı və işçi qüvvəsinin yükü mühüm məsələlər kimi göstərilir.

Almaniyada fəaliyyət göstərən həkimlərin 23.4%-i 60 yaşdan yuxarıdır. Ölkədə həkim çatışmazlığını xaricdən gələn həkimlər kompensasiya edir. Burada ümumilikdə xarici vətəndaşlığı olan həkimlərin sayı 71 480-ə çatıb.