Rusiya sülhməramlılarının müvəqqəti yerləşdiyi Azərbaycan ərazilərində nəzarətin daha da gücləndirilməsi tapşırığı verilib.Belə ki, bu barədə Müdafiə Nazirliyi məlumat yayıb. Qeyd edilib ki, Qarabağ iqtisadi rayonunda Rusiya sülhməramlı kontingentinin müvəqqəti yerləşdiyi ərazilərdəki qeyri-qanuni silahlı dəstələrinin fəaliyyətinin daim müşahidə edilməsi fonunda nəzarətin daha da gücləndirilməsinə dair müvafiq tapşırıqlar verilib.
Politoloq İlqar Vəlizadənin fikrincə, əslində sülhməramlılar orada yerləşdirildiyi dövrdən gücləndirilmiş rejimdə fəaliyyət göstərilməli idi.

“Gücləndirilmiş rejim çərçivəsində bunlar qanunsuz birləşmələri tərksilah etməli, regiona kənar şəxsləri buraxmamalı idilər. Terrorun qarşısını almaq üçün müvafiq tədbirlər görüməli idi. Onlar isə müvəqqəti yerləşdiyi ərazidə baxçalara səfər edib, heykəl açılışına gedirlər, müxtəlif humanitar aksiyalarda iştirak edirlər. Sanki, onlar sülhməramlılar yox, Qızıl Xaç Cəmiyyətinin nümayəndələridir.

Digər tərəfdən son gərginlik də onu göstərir ki, əgər sülhməramlılar öz öhdələrinə düşən vəzifələrini yerinə yetirə bilməsələr, o zaman Azərbaycan tərəfi müvafiq tədbirlərlə öz üzərinə düşən missiyanı yerinə yetirəcək, Ermənistana məxsus silahlı birləşmələri zərərsizləşdiriləcək”,- deyə politoloq bildirib.

Onun sözlərinə görə, regionda vəziyyətin köklü surətdə dəyişilməsi üçün bu vacibdir. Rusiya sülhməramlılarının müvəqqəti nəzarət etdiyi ərazilərə Azərbaycan əhalisi tədricən qayıtmağa başlamalıdır. Xocalıda, Xankəndidə, Əsgəranda, Ağdərədə, Xocavənddə azərbaycanlıların yurd-yuvaları vardı.

Azərbaycan əhalisi əsrlər boyu bu ərazilərdə yaşayıb. Sonradan Sovetlər İttifaqı dönəmində, ondan əvvəlki dönəmdə bəzi yaşayış məntəqələri düşmən tərəfindən mənimsənilib, adları dəyişdirilib.

“İndi əks proses gedir. azərbaycanlılar öz torpaqlarına qayıtmalıdırlar. Sülhməramlılar bunun qarşısını ala bilməzlər. Burada transformasiya prosesi getməlidir. Əgər, bu istiqamətdə prosseslər getsə, regionda sabitlik olacaq. Bu da regionda yaşayan insanlar üçün vacibdir. Əgər, əks istiqamətdə prosseslər getsə, onda yeni münaqişə üçün zəmin yaranacaq”. Politoloq bildirib ki, bu nə Azərbaycan tərəfi üçün, nə Ermənistan, nə də region üçün lazım olan məsələ deyil.