Sosial Strateji Tədqiqatlar və Analitik Araşdırmalar İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Soyqırımı və deportasiya qurbanlarına dəstək” layihəsinin icrasını uğurla davam etdirir.

Millixəbər.az xğəbər verir ki, layihə çərçivəsində Türkiyə Respublikasının İstanbul şəhərində “Deportasiya qurbanlarının qayıdış imkanlarının reallaşdırılması istiqamətində beynəlxalq platforma” mövzusunda beynəlxalq konfransın keçirilməsi nəzərdə tutulur.

Konfransa hazırlıq məqsədilə Bakıda tədqiqatçılar, QHT və dövlət qurumlarının nümayəndələri, eləcə də Qərbi Azərbaycan İcmasının iştirakı ilə dəyirmi masa təşkil olunub. Tədbirdə konfransın daha səmərəli təşkili ilə bağlı fikir mübadiləsi aparılıb.

Dəyirmi masada çıxış edən Sosial Strateji Tədqiqatlar və Analitik Araşdırmalar İctimai Birliyinin Prezidenti İlqar Hüseynli layihənin əhəmiyyətindən danışıb. Təşkilatın beynəlxalq məsələlər üzrə sədr müavini Fərhad Qəşəmli isə layihənin məqsəd və vəzifələrinə dair təqdimatla çıxış edib.

Azərbaycan Milli QHT Forumunun İdarə Heyətinin sədri Ramil İsgəndərli bildirib ki, Sosial Strateji Tədqiqatlar və Analitik Araşdırmalar İctimai Birliyi layihənin icrası istiqamətində son dörd ildə yerli və beynəlxalq səviyyədə ardıcıl fəaliyyət göstərir. O, layihənin türkdilli auditoriyaya çatdırılmasını yüksək qiymətləndirərək bildirib ki, Qərbi Azərbaycana qayıdış məsələsinin beynəlxalq platformalarda təqdimatı mühüm əhəmiyyət kəsb edir.

Daha sonra ekspertlər və QHT rəhbərləri Mirəli Hüseynli, Zamin Zeynal, Vüsalə Hüseynli, İradə Rizazadə, Əhməd Abbasbəyli, Xatirə Vəliyeva, Aqil Camal, Rauf Zeyni və Aynurə Miriyeva layihənin aktuallığını vurğulayaraq gələcək fəaliyyətlə bağlı təkliflərini səsləndiriblər. Bildirilib ki, səsləndirilən təkliflər Sosial Strateji Tədqiqatlar və Analitik Araşdırmalar İctimai Birliyi tərəfindən layihənin strateji potensialının gücləndirilməsi və müvafiq yol xəritəsinin hazırlanması prosesində nəzərə alınacaq.