“Mətbəx mədəniyyəti olan xalqın kökü var. Adətən insanlar hardasa bir heyvanı kəsir, bişirir, yeyir və gedir. Bu, əsasən daha çox həmin xalqın köçəri olduğunu, ya da ki, daha köklü olmadığını göstərir. Amma hansı xalqa baxırsan ki, onun mətbəxində bir mədəniyyət, incəsənət var, bunu dərin bir sənətə çevirir. Deməli, həmin xalqın uzun müddət gəldiyi yol var. Çünki onu etməyə zaman lazımdır. Həm də bunun üçün düşüncəsi var”.

Millixəbər.az xəbər verir ki, bu sözləri deputat Vüqar İskəndərov “İrəvan xanlığının mətbəxi” kitabının ingilis dilində nəşrinin təqdimat mərasimində deyib.

“Çox vaxt siyasi görünən məsələlər bayraq qabağında, prezidentlərin əl sıxıb, gülümsəyib, görüşdüyü məqamlarda həll olunmur. O məsələlərin bir çoxu yemək arxasında həll olunur.

Uşaq anadan olanda birinci tanıdığı yer ağzıdır. Bu insanın yeməklə bağlı doğuşdan genetik quruluşu ilə bağlıdır. Bu, bir mədəniyyətə çevrilirsə, təbii ki, kökü bildirir. Belə kitablar bizə lazımlı və vacibdir”, - deyə millət vəkili bildirib.