Azərbaycan Dövlət İqtisad Universitetində (UNEC) dosent Azər Mehtiyev, baş müəllim Ülviyyə Rəsul və Ankara Hacı Bayram Vəli Universitetinin professoru Atilla Gökçenin birgə hazırladığı “İqtisadi dinamikanın əsasları” dərsliyinin təqdimatı keçirilib.

Tədbirdə elm və təhsil ictimaiyyətinin nümayəndələri, iqtisadçılar və digər qonaqlar iştirak ediblər.

Təqdimatda Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişli də iştirak edərək çıxış edib.
Çıxışı zamanı Tahir Mirkişli müasir iqtisadi proseslərin mahiyyətinin düzgün dərk edilməsində dinamik modelləşmənin əhəmiyyətini vurğulayıb.
“Hazırda əsl iqtisadi düşüncə – bu gün baş verənlərin sabahı necə dəyişəcəyini görə bilməkdir. Bunun üçün dinamik modelləşməni öyrənməyə böyük ehtiyac var”, – deyə komitə üzvü qeyd edib.

Bildirilib ki, “İqtisadi dinamikanın əsasları” dərsliyi iqtisadi proseslərin zaman daxilində dəyişməsini, bu dəyişikliklərə təsir edən amilləri və dinamik modelləşmənin tətbiqi imkanlarını öyrənmək baxımından mühüm mənbə kimi nəzərdə tutulub.
Təqdimat zamanı dərsliyin hazırlanmasının məqsədləri, elmi və praktiki əhəmiyyəti, həmçinin iqtisadi dinamikanın öyrənilməsində yaratdığı imkanlar barədə məlumat verilib.
Qeyd edək ki, dərslik iqtisadi proseslərin daha dərindən təhlili və gələcək dəyişikliklərin proqnozlaşdırılması baxımından tələbə və tədqiqatçılar üçün faydalı elmi-metodik vəsait olmaqla yanaşı, müasir iqtisadi düşüncənin formalaşmasına da töhfə verməyi hədəfləyir.