Müasir dövrdə informasiya cəmiyyətinin formalaşması dövlətlərin sosial-iqtisadi inkişaf strategiyalarında əsas prioritetlərdən biri kimi çıxış edir. Bu prosesdə gənclər informasiya və kommunikasiya texnologiyalarının əsas istifadəçiləri və eyni zamanda innovativ ideyaların daşıyıcıları kimi mühüm rol oynayırlar. Azərbaycanda gənclərin informasiya cəmiyyətinə inteqrasiyası dövlət siyasətinin əsas istiqamətlərindən biridir.



Prezident İlham Əliyevin rəhbərliyi ilə həyata keçirilən gənclər siyasəti gənclərin bilik və bacarıqlarının artırılmasına, rəqəmsal savadlılığının inkişafına və onların cəmiyyətin bütün sahələrində fəal iştirakına yönəlib. Qəbul olunan dövlət proqramları və strategiyalar gənclərin informasiya texnologiyalarına çıxış imkanlarını genişləndirir, onların qlobal bilik mühitinə inteqrasiyasını sürətləndirir.
Təhsil sahəsində aparılan islahatlar, elektron təhsil resurslarının tətbiqi və xaricdə təhsil proqramları gənclərin informasiya cəmiyyətində rəqabətqabiliyyətli insan kapitalı kimi formalaşmasına şərait yaradır. Bu amil bilik iqtisadiyyatının inkişafında gənclərin rolunu daha da gücləndirir.
Eyni zamanda, gənclər informasiya cəmiyyətində ictimai fəallığın artmasında da mühüm rol oynayırlar. Sosial media və rəqəmsal platformalar vasitəsilə gənclər ictimai rəyin formalaşmasında iştirak edir, sosial təşəbbüslərlə çıxış edir və vətəndaş cəmiyyətinin inkişafına töhfə verirlər. Dövlət tərəfindən gənclər təşkilatlarının və könüllülük fəaliyyətinin dəstəklənməsi bu prosesi stimullaşdıran əsas amillərdəndir.
İnnovasiya və rəqəmsal iqtisadiyyat sahəsində yaradılan imkanlar gənclərin startap fəaliyyətinə və texnoloji layihələrə cəlb olunmasını təmin edir. Texnoparkların və innovasiya mərkəzlərinin fəaliyyəti gənclərin informasiya cəmiyyətində iqtisadi subyekt kimi mövqeyini möhkəmləndirir.
Beləliklə, Azərbaycanda həyata keçirilən dövlət gənclər siyasəti gənclərin informasiya cəmiyyətində fəal iştirakını təmin etməklə ölkənin dayanıqlı inkişaf strategiyasının mühüm tərkib hissəsi kimi çıxış edir. Gənclərin bilik, texnologiya və innovasiya sahəsində artan rolu Azərbaycanın gələcək inkişafında mühüm əhəmiyyət kəsb edir.

Zamin Zeynal
"Müasir İnternet Resurslarının İnkişafı" İctimai Birliyinin sədri