28 May – Müstəqillik Günü münasibətilə Gənclər Təşkilatlarının Resurs Mərkəzində silsilə tədbir təşkil olunub. Tədbirdə ictimai xadimlər, gənclər təşkilatlarının nümayəndələri və ziyalılar iştirak ediblər.

Tədbirin əsas məqsədi Azərbaycan Xalq Cümhuriyyətinin tarixi əhəmiyyətinin gənclərə çatdırılması, milli-mənəvi dəyərlərin təbliği və müstəqillik ənənələrinin yaşadılması olub.

Tədbirdə çıxış edən Əbədi Birlik Gənclər İctimai Birliyinin sədri, Qasım Bəy Zakirin 8-ci kökdən nümayəndəsi İlkin Məmiyev Azərbaycan dövlətçiliyinin və milli birliyin qorunmasının vacibliyindən danışaraq, gənclərin vətənpərvərlik ruhunda formalaşmasının önəmini vurğulayıb.

Daha sonra çıxış edən Vətənpərvərlər İctimai Birliyinin sədri Muğan Əliyev, Filologiya üzrə fəlsəfə doktoru, dosent İlhamə Qəsəbova, Müasir İnternet Resurslarının İnkişafı İctimai Birliyinin sədri Zamin Zeynal və tarixçi, Cümhuriyyət araşdırmaçısı Əfqan Vəliyev Azərbaycan Xalq Cümhuriyyətinin tarixi, müstəqillik ənənələri və müasir Azərbaycanın inkişaf yolu haqqında fikirlərini bölüşüblər.

Tədbirin bədii hissəsində Əbədi Birlik Gənclər İctimai Birliyinin fəal gənci və aparıcı Aysel Sadıxova tərəfindən “Odlar Yurdu Azərbaycan” şeiri səsləndirilib. Şeir iştirakçılar tərəfindən böyük maraq və alqışla qarşılanıb.

Sonda tədbir iştirakçıları ilə xatirə şəkilləri çəkdirilib və təşkilatçılara təşəkkür bildirilib.

Qeyd edək ki, 28 May – Müstəqillik Günü Azərbaycan xalqının dövlətçilik tarixinin ən önəmli və şərəfli səhifələrindən biridir.