Prezident İlham Əliyevin Sülh Şurasının ilk iclasında iştirakı həm ölkəmizin beynəlxalq nüfuzunun artmasının, həm də qlobal sülh təşəbbüslərində fəal iştirakının bariz göstəricisidir. Bu səfər, eyni zamanda, Azərbaycanın strateji tərəfdaşlıq siyasətinin, regional və qlobal təhlükəsizlik gündəliyində artan rolunun mühüm təsdiqidir.

Millixəbər.az xəbər verir ki, Bəbu sözləri AZƏRTAC-a açıqlamasında Milli Məclisin deputatı Jalə Əliyeva deyib.

Deputat bildirib ki, Sülh Şurasının ilk iclası beynəlxalq təhlükəsizlik, münaqişələrin həlli və dialoq mexanizmlərinin gücləndirilməsi baxımından xüsusi əhəmiyyət daşıyır. Prezident İlham Əliyevin bu mühüm platformada iştirakı Azərbaycanın artıq təkcə regional deyil, qlobal miqyasda söz sahibi olan dövlət kimi qəbul edildiyini göstərir. Azərbaycan son illərdə balanslaşdırılmış xarici siyasəti, müxtəlif siyasi qütblər arasında körpü rolunu oynaması və multikultural dəyərlərə verdiyi töhfələrlə beynəlxalq etimad qazanıb. Prezidentin bu iclasda iştirakı Azərbaycanın sülhə, sabitliyə və əməkdaşlığa verdiyi real töhfələrin beynəlxalq səviyyədə yüksək qiymətləndirildiyini təsdiqləyir.

J.Əliyevanın sözlərinə görə, Vaşinqton kimi qlobal siyasi qərarların qəbul olunduğu bir mərkəzdə keçirilən bu tədbirdə Prezident İlham Əliyevin iştirakı həm də ölkəmizin müstəqil siyasət yürüdən, milli maraqlarını qətiyyətlə müdafiə edən, eyni zamanda, beynəlxalq əməkdaşlığa açıq dövlət olduğunun bariz nümunəsidir. Azərbaycanın beynəlxalq platformalarda fəal iştirakı ölkənin diplomatik uğurlarının davamlı xarakter daşıdığını nümayiş etdirir. Prezident İlham Əliyevin diplomatik fəaliyyəti və təşəbbüsləri bu prosesdə həlledici rol oynayır. Dövlətimizin başçısının Vaşinqtona səfəri və Sülh Şurasının ilk iclasında iştirakı, həmçinin Azərbaycanın xarici siyasətində yeni imkanlar açır.

“Bir sözlə, Prezident İlham Əliyevin Sülh Şurasının iclasında iştirakı Azərbaycanın artıq qlobal siyasi proseslərin fəal iştirakçısına çevrildiyini bir daha sübut edir. Bu səfər Azərbaycanın sülh təşəbbüslərinə verdiyi töhfənin, diplomatik gücünün və strateji əhəmiyyətinin növbəti mühüm təsdiqidir. Bu, eyni zamanda, onu göstərir ki, dövlətimizin başçısının rəhbərliyi ilə Azərbaycan yalnız regionda deyil, beynəlxalq miqyasda da sabitliyin, əməkdaşlığın və sülhün təşviqində mühüm rol oynayan etibarlı tərəfdaş kimi çıxış edir”, - deyə o əlavə edib.