Prezident İlham Əliyev bir-birinin ardınca diplomatik uğurlar qazanmaqla və yeni tarixi səhifələrə imzalar atmaqla dünya ictimaiyyətini heyrətləndirir, müasir dövrün lideri olduğunu bir daha sübut edir. Dövlətimizin başçısının bir neçə gün əvvəl ABŞ-a səfəri çərçivəsində Vaşinqtonda Amerika Birləşmiş Ştatlarının Prezidenti Donald Tramp və Ermənistanın Baş naziri Nikol Paşinyanla birlikdə keçirdiyi görüşdə imzalanan sənədlər, ABŞ Prezidentinin dövlətimizin başçısı ilə dostyana səmimi söhbətləri, Azərbaycan Prezidentinə Ağ Ev-in rəmzi açarını təqdim etməsi hər bir azərbaycanlını qürurlandırdı. Donald Trampın özü də etiraf etdi ki, o, Ağ Evin rəmzi açarını nadir hallarda təqdim edir. Həmin səfərdə yadda qalan mühüm tarixi hadisələrdən biri də ölkəmiz üçün xüsusi əhəmiyyət kəsb edən məsələlərdən biri olan, ABŞ Prezidenti tərəfindən “Azadlığa Dəstək Aktı”na 907-ci düzəlişin tətbiqinin dayandırılması barədə sərəncamın imzalanması oldu.

Millixeber.az xəbər verir ki, bu fikirləri AZƏRTAC-a açıqlamasında “Modern İnkişaf və Ailə” İctimai Birliyinin sədri, YAP Veteranlar Şurasının üzvü Zərifə Quliyeva bildirib.

Tanınmış ictimai-siyasi xadim deyib ki, bu görüşün yekunları mənə möhtərəm Prezidentimizin qətiyyətlə dediyi “Bu günə qədər elə bir təşəbbüsümüz olmayıb ki, o reallığa çevrilməsin. Nəyi demişiksə, onu da etmişik. Bir dənə də yerinə yetirilməmiş vəd yoxdur!” müdrik kəlamını xatırlatdı. Səfər çərçivəsində baş verən tarixi hadisələrdən birinin – ABŞ Prezidenti tərəfindən “Azadlığa Dəstək Aktı”na 907-ci düzəlişin tətbiqinin dayandırılması barədə sərəncamın imzalanmasından söhbət açan Z.Quliyeva bunun Azərbaycana və onun liderinə olan hörmət və ehtiramın nəticəsi olduğunu bildirib: “Bununla yanaşı, uzun illərdir ki, ermənipərəst konqresmenlərin ölkəmizə qarşı apardıqları qərəzli siyasətə son qoyuldu. Gec də olsa, haqq-ədalət öz yerini tapdı. ABŞ kimi qüdrətli dövlətin ölkəmizə qarşı münasibətinin dəyişməsinin, iki ölkə arasında əməkdaşlığın yeni müstəviyə qədəm qoymasının əsas səbəbi Prezident İlham Əliyevin düşünülmüş siyasi kursunun nəticəsidir. Dövlətimizin başçısının ABŞ-a səfəri zamanı Azərbaycan-ABŞ arasında əldə edilmiş razılaşmalar və Azərbaycan-Ermənistan münasibətlərinin normallaşma prosesi çərçivəsində nəticələrin tarixi əhəmiyyətə malik olması ölkəmizin dünya birliyindəki nüfuzunu daha da artırdı. Bu səfər, eyni zamanda, region üçün də mühüm əhəmiyyət kəsb etdi”.

İctimai Birliyinin sədri ABŞ Prezidenti Donald Trampın 1992-ci ildə qəbul edilmiş və Azərbaycana dövlət yardımını məhdudlaşdıran “Azadlığı Müdafiə Aktı”na 907-ci düzəlişin icrasının dayandırılması barədə qərarı imzalamasını tarixi hadisə adlandırıb. O qeyd edib ki, ABŞ Konqresi 1992-ci ildə Ermənistanın Azərbaycana qarşı təcavüzü fonunda, rəsmi Bakının, guya, İrəvana “blokada” tətbiq etdiyi iddiası ilə ölkəmizə birbaşa dövlət yardımını qadağan edən 907-ci düzəlişi qəbul etmişdi.

Z.Quliyeva ABŞ Konqresi tərəfindən belə bir düzəlişin qəbul edilməsinin qərəzli və ədalətsiz olduğunu vurğulayaraq deyib ki, həmin dövrdə Azərbaycan torpaqları Ermənistan silahlı qüvvələri tərəfindən işğal olunurdu. Bununla yanaşı, Azərbaycan xalqı etnik təmizləməyə, soyqırımına məruz qalırdı. Beynəlxalq hüquqa hörmətsizliyi və saymazlığı, humanizmə qarşı vəhşiliyi Ermənistan törətsə də, ABŞ Konqresi qərəzli şəkildə Azərbaycana qarşı belə bir ədalətsiz qərar qəbul etdi: “Əslində, bu qərar ermənipərəst konqresmenlərin Azərbaycanın müstəqilliyini həzm edə bilməmələrinin və ölkəmizin müstəqil dövlət kimi inkişafına problem yaratmaq olmuşdur. Çətinliklərə və problemlərə baxmayaraq, Azərbaycan mövqeyindən dönməmişdir. Xüsusilə, 1993-cü ilin ikinci yarısından başlayaraq, Ulu Öndər Heydər Əliyevin rəhbərliyi ilə Azərbaycan müstəqillik yolunda inamla irəliləmiş, nüfuzlu beynəlxalq qurumlarla əməkdaşlığı genişləndirmiş, hətta həmin təşkilatların fəal üzvlərindən birinə çevrilmişdir”.

Veteran YAP-çı qeyd edib ki, Azərbaycanın sürətli inkişafı, beynəlxalq aləmə inteqrasiyası yüksək dəyərləndirilmiş və bir sıra ABŞ prezidentləri 907-ci düzəlişin icrasının müvəqqəti olaraq dayandırılması barədə qərar qəbul etmişlər. O xatırladıb ki, 2001-ci ildə ABŞ Prezidenti olmuş Corc Buş Əfqanıstanda antiterror əməliyyatlarına başladıqdan sonra Azərbaycanın rolunun, dəstəyinin əhəmiyyətini yüksək qiymətləndirərək həmin düzəlişin icrasını müvəqqəti dayandırmaqla bağlı qərar imzalamışdı. Lakin erməni lobbisinin əlində oyuncağa çevrilən ABŞ-nin keçmiş prezidenti Co Bayden və onun administrasiyası 907-ci düzəlişi yenidən gündəmə gətirmiş və bu yolla Azərbaycana siyasi təzyiq göstərməyə cəhd etmişdir. Bayden administrasiyasının bu qərarı iki ölkə arasında münasibətlərə kifayət qədər mənfi təsir göstərdi. Artıq bütün bunlar arxada qaldı.

“ABŞ Prezidenti Donald Trampın "Azadlığa Dəstək Aktı”nın Azərbaycanla bağlı qəbul etdirdiyi 907-ci düzəlişin fəaliyyətinin dayandırılmasına dair imzaladığı memorandumun mətni ABŞ hökumətinin rəsmi jurnalı olan “Federal Register”də dərc edilib. Ədalətsiz 907-ci düzəlişin ləğv edilməsi Azərbaycanla ABŞ arasında qurulan strateji tərəfdaşlığın növbəti göstəricisidir. Bu, iki ölkə arasında münasibətlərin yeni müstəviyə qədəm qoymasından xəbər verir”, - deyə Z.Quliyeva bildirib.