Sumqayıt şəhərində Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin təşkilatçılığı ilə “PeşəFest-2026” tədbiri keçirilib.

Millixeber.az xəbər verir ki, tədbirdə müxtəlif peşə və ixtisaslar təqdim olunub, gənclərin əmək bazarının mövcud tələbləri ilə tanış olmaları və peşə seçimləri ilə bağlı məlumat əldə etmələri üçün imkan yaradılıb.
“PeşəFest” yalnız peşələrin nümayiş olunduğu tədbir deyil, eyni zamanda gənclərin öz bacarıq və istedadlarını kəşf etmələrinə, əmək bazarının real ehtiyaclarını daha yaxından tanımalarına və gələcək karyera istiqamətləri ilə bağlı daha düzgün qərarlar vermələrinə xidmət edən mühüm platformadır.
Tədbirdə millət vəkili Tahir Mirkişili də iştirak edərək çıxış edib. Çıxış zamanı gənclərin peşə və ixtisas seçimlərinin onların gələcək karyera imkanlarına təsiri, əmək bazarının tələblərinə uyğun bacarıqların formalaşdırılmasının əhəmiyyəti barədə fikirlər səsləndirilib.
Qeyd olunub ki, müasir əmək bazarında rəqabətqabiliyyətli olmaq üçün peşə bacarıqlarının inkişaf etdirilməsi, praktiki biliklərin artırılması və əmək bazarının tələblərinin düzgün qiymətləndirilməsi mühüm əhəmiyyət daşıyır.
“PeşəFest-2026” çərçivəsində keçirilən tədbirlər gənclərin peşə dünyası ilə daha yaxından tanışlığına, onların düzgün istiqamətləndirilməsinə və gələcək karyera seçimlərinə dəstək göstərilməsinə xidmət edir.