Sumqayıt şəhərində Azərbaycanın müasir tarixinin mühüm hadisələrindən biri olan “Əsrin müqaviləsi”nin ölkənin iqtisadi inkişafı və milli dövlətçilik tarixində rolu, eləcə də Azərbaycanın əldə etdiyi tarixi Zəfər və suverenliyinin tam bərpası mövzusunda elmi-praktik konfrans keçirilib.

Yeni Azərbaycan Partiyası (YAP) Sumqayıt şəhər təşkilatının, Sumqayıt Şəhər İcra Hakimiyyətinin və “Azərikimya” İstehsalat Birliyinin birgə təşkilatçılığı ilə keçirilən tədbir “Əsrin müqaviləsindən – Suverenliyə” mövzusuna həsr olunub.
Konfransda dövlət və ictimaiyyət nümayəndələri, Milli Məclisin deputatları, şəhər ictimaiyyətinin fəalları, müəssisə və təşkilatların rəhbərləri, ziyalılar və gənclər iştirak ediblər.
Tədbirdə çıxış edənlər Azərbaycanın müstəqillik tarixində mühüm əhəmiyyət daşıyan “Əsrin müqaviləsi”nin imzalanmasının ölkənin iqtisadi inkişafında, enerji sektorunun modernləşdirilməsində və Azərbaycanın dünya enerji təhlükəsizliyində etibarlı tərəfdaşa çevrilməsində mühüm rol oynadığını bildiriblər.
Qeyd olunub ki, 1994-cü ildə imzalanan “Əsrin müqaviləsi” Azərbaycanın iqtisadi və siyasi inkişafında yeni mərhələnin əsasını qoymaqla yanaşı, ölkənin beynəlxalq mövqelərinin möhkəmlənməsinə və milli maraqlara əsaslanan müstəqil siyasətin həyata keçirilməsinə mühüm imkanlar yaradıb.
Konfransda Milli Məclisin deputatı Tahir Mirkişili də çıxış edib.
Deputat çıxışında Azərbaycanın son onilliklər ərzində keçdiyi inkişaf yoluna nəzər salaraq, ölkənin iqtisadi gücü ilə siyasi müstəqilliyi və milli təhlükəsizliyi arasında qarşılıqlı əlaqələrə diqqət çəkib. Bildirib ki, enerji sektorunda həyata keçirilən strateji layihələr Azərbaycanın iqtisadi potensialının artmasına, dövlətin maliyyə imkanlarının genişlənməsinə və uzunmüddətli inkişaf strategiyasının reallaşdırılmasına mühüm töhfələr verib.
Tahir Mirkişili “Əsrin müqaviləsi”nin Azərbaycanın gələcək inkişafı üçün yaratdığı imkanlardan danışaraq, ölkənin iqtisadi gücünün artırılmasının sonrakı mərhələlərdə milli məqsədlərin həyata keçirilməsi baxımından mühüm əhəmiyyət daşıdığını vurğulayıb.
Çıxış zamanı Azərbaycanın 44 günlük Vətən müharibəsində qazandığı tarixi Qələbə və 2023-cü ilin sentyabrında həyata keçirilən lokal xarakterli antiterror tədbirləri nəticəsində ərazi bütövlüyünün və suverenliyinin tam bərpa olunmasının ölkənin müasir tarixində yeni mərhələ açdığı qeyd edilib.
Bildirilib ki, iqtisadi qüdrətin möhkəmləndirilməsi, milli maraqlara əsaslanan ardıcıl dövlət siyasəti və ölkənin müdafiə potensialının gücləndirilməsi Azərbaycanın öz suverenliyini təmin etməsi üçün mühüm amillərdən olub.
Konfransda “Əsrin müqaviləsi”ndən başlayan enerji strategiyasının Azərbaycanın iqtisadi inkişafına təsiri, ölkənin regional və beynəlxalq mövqelərinin möhkəmlənməsi, işğaldan azad edilmiş ərazilərdə həyata keçirilən genişmiqyaslı quruculuq işləri və Azərbaycanın yeni inkişaf mərhələsi ilə bağlı fikir mübadiləsi aparılıb.